Feijóo declara un patrimonio por valor de máis de medio millón de euros

|

Feijoodespacho


O valor dos bens do presidente galego, Alberto Núñez Feijóo, ascende a 562.341,29 euros, segundo publica este venres o Diario Oficial de Galicia (DOG), o que supón uns 15.040 euros menos con respecto á declaración realizada en febreiro de 2013. Neste período, o xefe do Executivo reduciu a débeda ata 31.905 euros, case 45.000 euros menos dos 76.727 que declarou fai catro anos.


O DOG publica este venres as declaracións de bens tanto do presidente como dos restantes membros do Executivo que, no seu conxunto, superan os 1,7 millóns de euros. Nesta mesma xornada, o Parlamento de Galicia fixo públicos tamén as declaracións dos deputados que integran a Cámara autonómica.


Na publicación do DOG faise constar que Feijóo dispón de bens inmobles que suman un valor catastral de 231.620,85 euros, aínda que constata que hai bens da súa propiedade --unha casa en construción en Moaña (Pontevedra) e unha leira rústica en Ames (A Coruña)-- cuxo valor catastral está pendente de fixar.


En canto ao resto de bens, ascenden a 330.720 euros. No apartado contable de pasivo (relativo a créditos, débedas, préstamos e demais), Feijóo computa 31.905,77 euros fronte aos 76.727 que declarou en 2013, o que supón que a reduciu en case 45.000 euros en catro anos --44.822 euros--.


174.350 EUROS EN DEPÓSITOS BANCARIOS


No detalle que consta na súa declaración da Cámara, reflíctese o seu salario como presidente da Xunta, dividendos de Telefónica por 31,20 euros, 2.036,75 de intereses por depósitos bancarios e 10.800 euros de rendemento por arrendamento de inmoble.


Así mesmo, concrétanse os seus bens inmobles: unha vivenda en Madrid e outra en Vigo, adquiridas ambas as no ano 2001, así como un garaxe na cidade olívica que comprou tamén no mesmo exercicio, unha leira rústica en Ames que adquiriu en 1992, e unha vivenda en construción en Moaña de 2016.


En depósitos bancarios en contas correntes ou de aforro, o xefe do Executivo declara 174.350 euros; 664,8 euros por 75 accións de Telefónica; un coche comprado en 2011; e 143.264,64 euros en dereitos consolidados en plans de pensións.


VILLARES E PONTÓN, OS MÁIS HIPOTECADOS


Luís Villares (En Marea) e Ana Pontón (BNG) son os portavoces parlamentarios que máis diñeiro deben ao banco ao ter ambos senllos préstamos hipotecarios para a compra dunha vivenda habitual. En concreto, o exmaxistrado lucense debe 118.020 euros dun préstamo de 153.500 euros concedido en 2011, mentres que á líder do Bloque fáltanlle por pagar 117.437 euros dunha hipoteca de 137.300 concedida en 2012.


ALMUÍÑA, O CONSELLEIRO CON MÁIS PATRIMONIO


O titular de Sanidade, Jesús Vázquez Almuíña, segue sendo o conselleiro de todos o que acompañan ao titular da Xunta, Alberto Núñez Feijóo, no seu Goberno, que declara un maior patrimonio (cun total de 181.754 euros). Tamén fai constar un pasivo (entre créditos, préstamos e débedas) de 1.659,65 euros.


Ademais, en relación á última declaración publicada o ano pasado tras as novas incorporacións ao Executivo autonómico, o conselleiro de Facenda, Valeriano Martínez, é o que máis elevou o patrimonio que fai constar, ao pasar de 23.500 a 125.033 euros. A explicación é a construción dunha nova casa en 2016 (o incremento prodúcese no apartado de bens inmobles).


Pola súa banda, o vicepresidente da Xunta e conselleiro de Presidencia, Alfonso Rueda, declara un valor total de bens por 102.196,30 euros e un pasivo de 80.172 euros.


En conselleiro autonómico que declara un patrimonio menor é o titular de Política Social, José Manuel Rey Varela, cun total de 87.543,24 euros. Cun valor catastral de 73.838,24 euros, declara unha vivenda e un garaxe no apartado de bens patrimoniais inmobles. En contas bancarias, o seu saldo ascende a 10.232.


Así mesmo, dispón dun Audi A3 adquirido en 2004, e no apartado de débedas, pediu unha hipoteca vivenda no ano 2006 por 150.000 euros, da que mantén un saldo pendente de 93.000 euros.


Pola súa banda, a conselleira de Medio Ambiente, Beatriz Mato, declara un patrimonio por valor de 161.500 euros. Do total, rexistra 125.000 euros en bens inmobles. É a conselleira con maior pasivo (contraído por créditos, préstamos ou débedas), por 238.000 euros, aínda que igualmente reduciuno desde a súa última declaración.


SANTALICES ROLDA UN MILLÓN DE EUROS EN PATRIMONIO


O presidente do Parlamento de Galicia, Miguel Santalices (PP) é o membro do órgano reitor da Cámara (a Mesa) que acumula patrimonio por máis valor, entre bens inmobles, depósitos bancarios, activos financeiros e fondos de investimento.


Nas declaracións de bens e dereitos que publicou a Cámara autonómica este venres, Santalices figura como propietario de dous pisos (un en Ourense e outro en Pontevedra), unha leira en Pontevedra, e un baixo comercial tamén en Pontevedra. O valor catastral destes inmobles supera, en total, os 440.000 euros.


Ademais, o xefe do Lexislativo declara contas correntes e plan de pensións por 146.721 euros e 322.870 euros en fondos de investimento e activos financeiros.


Entre bens inmobles, depósitos e fondos de investimento e outros activos o patrimonio de Santalices rolda o millón de euros. Pero, ademais, na súa declaración fai constar un Audi A8 comprado en 2011 e unha moto Piaggio.


Suma nas observacións tres prazas de garaxe --dous en Pontevedra e unha en Ourense-- e unha colección de obras de arte (da que non figura o valor), algunhas adquiridas por doazón e "a maioría", recalca, por compravenda.


SOLLA, SEN BENS INMOBLES E MENOS DE 16.000 EUROS NO BANCO


A vicepresidenta segunda da Cámara, Eva Solla (En Marea) non declara bens inmobles e informa de dous depósitos bancarios que, no seu conxunto, non alcanzan os 16.000 euros --un é de 927,29 euros e o outro, de 15.000--. Ten un coche e pediu un préstamo de financiamento do vehículo por 16.835 euros, do que lle que queda por pagar 11.721 euros.


Por último, a vicesecretaria do Parlamento, a socialista Concepción Burgo, declara un piso e unha praza de aparcadoiro en Lugo, así como depósitos bancarios por 105.000 euros. Tamén ten un Audi A4.

relacionada Os deputados de En Marea achegan, de media, 1.400 euros mensuais ao partido

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.
Cabecerarecomendadosgal 2
Cabeceraultimahora 2
Cabeceralomasleidogal 1


Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress