Estibadores e patronal alcanzan un principio de acordo que o Goberno rexeita

Os sindicatos de estibadores e a patronal Anesco alcanzaron este mércores un principio de acordo sobre os aspectos laborais da reforma do sector da estiba, aínda que o Goberno rexeitouno.

A subrogación dos traballadores e a petición do sector de que se recolla nunha lei ou outro instrumento normativo segue sendo o principal escollo para o acordo, segundo se desprende do indicado polas distintas partes ao termo da reunión mantida hoxe.

O Goberno non admite o principio de acordo entre empresas e sindicatos porque pide a subrogación por lei dos estibadores e axudas públicas para que as empresas compensen o distinto custo laboral que supoñerán os estibadores subrogados respecto de eventuais novas contratacións.

"Trátase de dúas medidas contrarias á normativa europea, ao sistema legal de relacións laborais e ao sentido común", asegurou o secretario de Estado de Infraestruturas do Ministerio de Fomento, que representa ao Executivo na reunión.

Pola súa banda, tanto os sindicatos do gremio como a patronal Anesco, expresaron a súa "sorpresa" ante o feito de que o Goberno rexeitase un acordo sectorial, en contra do que viñan mantendo ata agora.

A organización empresarial "lamentou" que non se puidese alcanzar un acordo tripartito, aínda que confía en que "a situación se poida reconducir", segundo o seu director xerente, Pedro García.

Do seu lado, Antolín Goya, dirixente de Coordinadora de Traballadores do Mar, principal sindicato de estibadores preguntouse que máis teñen que facer os axentes do sector "para demostrar ao Goberno que a reforma da estiba pode cumprir co que manda Europa doutra forma".

O mediador das negociacións, o presidente do Consello Económico e Social (CES), Marcos Pena, quedou en presentar hoxe un acordo de mediación co fin de reconducir a situación e analizar a posibilidade do acordo.