A factoría de Citroën de Vigo, número un en doazóns de sangue

//@doadoressangue

A primeira campaña de doazón de sangue realizado este ano pola Axencia de Doazón de Órganos e Sangue na planta de Vigo do grupo PSA Peugeot Citroën, contou coa participación de 754 traballadores.

Segundo informou o Servizo Galego de Saúde, coas doazóns destes empregados, recollidas entre o mércores e xoves da semana pasada, poderanse realizar, por exemplo, máis de 375 intervencións cirúrxicas, e transfundir plaquetas a 150 enfermos oncolóxicos.

Desde a posta en funcionamento no ano 1995 das campañas de doazón de sangue, promovidas pola Consellería de Sanidade, a factoría de PSA acumula un total de 58.418 doazóns de sangue, o que a sitúa como a empresa con maior participación no ámbito estatal.

A pasada semana, o conselleiro de Sanidade, Jesús Vázquez Almuíña, visitou as instalacións da planta para recoñecer e poñer en valor a "constante colaboración e especial sensibilidade" desta empresa coas doazóns, así como o "compromiso solidario e fidelidade" dos seus traballadores.