O PSdeG propón unha oficina para recibir denuncias confidenciais sobre corrupción
Trátase dunha das recomendacións que os socialistas achegarán á comisión parlamentaria sobre as relacións co Consello de Contas.
O PSdeG propoñerá habilitar unha oficina no Consello de Contas para recibir denuncias relativas a casos de fraude ou corrupción ben de cargos ou funcionarios públicos ou ben de empresas privadas na súa relación coa administración. A súa idea é que poidan ser tratadas de forma confidencial, como ocorre noutros países da nosa contorna europea, para así evitar calquera "represalia" que poida sufrir o denunciante.
Trátase dunha das recomendacións que os socialistas achegarán á comisión parlamentaria sobre as relacións co Consello de Contas, e aspiran a que poida ser asumida polo PPdeG. Diso deron conta este venres en rolda de prensa os deputados Juan Díaz Villoslada e Begoña Rodríguez Rumbo, xunto con outras achegas para o órgano fiscalizador e peticións á propia Xunta.
Escribe o teu comentario