Villares contradi a Iglesias e defende os espazos relixiosos en medios públicos

|

Villaresespaciosreligiososmisatve


O voceiro parlamentario de En Marea, Luís Villares, mostrouse "totalmente de acordo" con que as relixións poidan ter espazo nos medios de comunicación pública pero "sempre regulados e sen ningún trato de favor", á vez que defendeu "acabar cos privilexios da Igrexa católica", como a falta de pagamento do IBI.


Así o sinalou este venres en Ourense tras ser preguntado pola proposición non de Lei presentada a pasada semana por Podemos no Congreso para "suprimir as emisións de misa" que se realizan todas as semanas na segunda canle da televisión pública estatal.


Nun primeiro momento, en declaracións a un xornal este venres, o portavoz de En Marea defendeu que o en caso de Galicia a emisión dos oficios relixiosos cumpría unha "función de normalización" da lingua galega.


Villares volveu a insistir neste aspecto a pesar de que considera que "existe unha gran asintonía" entre unha cidadanía que fala galego e demanda este tipo de servizos relixiosos; e, en oposición, o que se lle está ofrecendo por parte dunha xerarquía eclesiástica que non ofrece galego.


FIN AOS "PRIVILEXIOS"


Para o portavoz de En Marea a proposta de Podemos non encerra polémica, senón a "idea de que deben acabar os privilexios" da Igrexa católica. "É un privilexio que preocupa a toda a sociedade que a Igrexa non pague o Imposto de Bens Inmobles (IBI) polos inmobles que ten no territorio", sinalou respecto diso.


Pero tamén alertou de que "un Estado laico e democrático non pode aceptar" que os profesores de relixión se paguen con fondos públicos e que "accedan sen ningún tipo de oposición nin control" a exercer o ensino.


Nesta liña tamén considerou como "un privilexio inaceptable" o feito de que a relixión forme parte do currículo de estudos. "Consideramos que existen privilexios que deben desaparecer", insistiu o portavoz parlamentario de En Marea.


Con todo, Villares defendeu unha aposta pola "tolerancia relixiosa" e que as relixións poidan ter espazos nos medios de comunicación, pero "sempre regulados e sen ningún trato de favor a ningunha confesión".


O BNG PIDE QUE SE ABRAN Os ESPAZOS A TODAS As CONFESIÓNS


Goretti Sanmartín, secretaria de Organización do BNG, considerou que nun Estado aconfesional os medios públicos non deben emitir cerimonias relixiosas.


Así se pronunciou a dirixente nacionalista este venres ao ser preguntada polas declaracións de Luís Villares a 'Faro de Vigo' nas que defendía que as misas na TVG axudan a "normalizar o galego" e apoiou a emisión en lingua propia de actos relixiosos pero "de todas as confesións".


Respecto diso, Goretti Sanmartín incidiu que nas canles públicas "non debe haber eses espazos" e que, no caso de que os haxa, "deben abrirse a todas as relixións".


"Que despois os oficios relixiosos de calquera relixión se fagan en galego parécenos positivo", sinalou.

relacionada En Marea cuestiona que a Xunta destine 6,7 millóns ás bonificacións na AP-9

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress