Bruxelas advirte a España que se non reforma a estiba, haberá "multas económicas"
Sinala que non hai prazo límite concreto, pero tilda de "esencial" a medida para dotar de "competitividade" os portos españois.
A Comisión Europea vén de advertir que é "esencial" que España aprobe a reforma do sector da estiba despois de que este xoves o Pleno do Congreso rexeitase o real decreto lei do Goberno, ao mesmo tempo que sinalou non hai un prazo límite concreto, pero que o recurso que presentou ante a xustiza europea propón multas económicas.
"A pesar do rexeitamento ao decreto proposto polo Goberno, é esencial que España reforme o sistema de traballo portuario, que non está en liña coa lei europea. Tamén é unha cuestión de competitividade para os portos españois", afirmou nunha rolda de prensa este venres a portavoz de Transportes do Executivo comunitario, Anna-Kaisa Itkonen.
"Convidamos a España a cumprir coa sentenza de decembro de 2014 do Tribunal de Xustiza e coas súas obrigacións como membro da Unión Europea", remarcou a portavoz, para despois engadir que Bruxelas "está como sempre preparada para asistir ás autoridades españolas".
Itkonen tamén sinalou que a Comisión Europea non dispón dunha data límite "específica", pero lembrou que se trata dun procedemento de infracción "en marcha" e que o recurso do Executivo comunitario propón multas concretas ata que España aprobe a reforma.
MÁIS DE 20 MILLÓNS DE EUROS EN MULTAS ACUMULADAS
A portavoz refírese ás dúas multas propostas por Bruxelas, sobre as que aínda ten que fallar a xustiza europea. A primeira delas impón unha sanción diaria de 27.522 euros desde o día no que o TUE declarou ilegal é sistema de traballo portuario español, o 11 de decembro de 2014. O montante acumulado ata hoxe por esta multa é de 22,8 millóns.
A segunda sanción supoñerá, se é confirmada polo tribunal, unha contía diaria de 134.107,2 euros desde o momento en que a xustiza europea falle a súa segunda sentenza. En calquera caso, trátase unicamente de propostas da Comisión Europea, que o futuro fallo do TUE pode modificar ou confirmar.
Ademais, a xustiza europea aínda pode tardar uns meses en pronunciarse sobre o caso. Segundo os datos do propio tribunal, a duración media dos procedementos é de 14,7 meses e o recurso da Comisión Europea foi presentado en xullo de 2016.
O Pleno do Congreso tombou este xoves o decreto lei do Goberno con 175 votos en contra de PSOE, Unidos Podemos, Esquerra (ERC), a antiga Convergència (PDeCAT), Compromís, EH Bildu, Coalición Canaria (CC) e Nova Canarias, fronte aos 142 votos a favor que sumaron o PP, os seus socios electorais de UPN e Foro Asturias, e o PNV. Pola súa banda, Ciudadanos optou pola abstención (32 votos máis un erro nas filas de Unidos Podemos).
Escribe o teu comentario