Santiago e Vigo perden pasaxeiros en febreiro fronte ao crecemento de Alvedro

Os aeroportos de Santiago de Compostela e Vigo perderon pasaxeiros no mes de febreiro en comparación ao ano anterior, mentres que A Coruña rexistrou un incremento do 8,4%.

Segundo os datos publicados este luns por Aena, os tres aeroportos galegos en conxunto perderon no segundo mes do ano 915 pasaxeiros, ata os 286.238, o que supón un 0,32% menos de usuarios que hai un ano.

Por aeroportos, a única cifra positiva foi a da Coruña, polo que pasaron 79.243 pasaxeiros, un 8,4% máis que hai un ano. Destes, 78.551 realizaron voos comerciais, dos que 70.042 viaxaron en traxectos nacionais e 8.509 internacionais.

En canto ás operacións, Alvedro rexistrou 1.171, un 10,2% máis, dos que 650 foron voos comerciais nacionais e 105 voos comerciais internacionais. Ademais, moveu máis de 14 toneladas de mercadorías.

CAÍDAS EN SANTIAGO E VIGO

O aeroporto de Santiago rexistrou durante o mes de febreiro 148.756 pasaxeiros, un 2,7% menos que no mesmo mes do ano anterior. Dos pasaxeiros de voos comerciais, 124.736 realizaron traxectos nacionais --un 6% menos-- e 23.654 internacionais --un 17,6% máis--.

En canto ás operacións, en Lavacolla rexistráronse 1.266 voos en febreiro de 2017, dos que 1.017 foron comerciais nacionais e 177 comerciais internacionais. Así mesmo, moveu 180 toneladas de mercadorías.

Finalmente, o aeroporto vigués de Peinador foi utilizado no segundo mes do ano por 58.239 pasaxeiros, un 4,9% menos que en febreiro de 2016. Destes, 56.392 fixeron traxectos nacionais e 1.847 internacionais.

En canto ás operacións, o aeródromo de Vigo operou 715 voos, dos que 597 foron comerciais --533 nacionais e 64 internacionais--. Moveu tamén case 30 toneladas de mercadorías.