Activada a alerta por choiva e por nevadas no interior
Tamén se esperan ventos intensos e que as precipitacións poidan estar acompañadas de aparello eléctrico.
Este venres Galicia queda baixo a influencia dunha borrasca situada ao sur das Illas Británicas, polo que Meteogalicia espera unha xornada de vento e choiva intensos. Sobre todo pola mañá, o ceo permanecerá cuberto, con choivas xeneralizadas, localmente acompañadas de aparello eléctrico e saraiba.
Espéranse recoller máis de 40 litros por metro cadrado en toda a provincia de Pontevedra, e na zona suroeste e oeste da Coruña.
Pola mañá, a cota de neve sitúase nos 1.000 metros, pero irá baixando conforme avance o día ata situarse nos 600 pola noite. Isto dará lugar a acumulacións que chegarán aos 5 centímetros nas montañas de Lugo e Ourense e na zona sur de Ourense.
O vento, do suroeste, moderado en xeral, será forte no litoral e en zonas altas.
ALERTA ACTIVADA
Por iso, Protección Civil activou a alerta por nevadas. De acordo coas predicións da Axencia Estatal de Meteoroloxía (AEMET) prevese que a cota de neve baixe durante o día ata os 500 a 700 metros no noroeste. Ademais prevense ventos fortes en terra, especialmente en zonas montañosas.
Escribe o teu comentario