O mal uso de redes sociais pode agravar o acoso escolar de adolescentes con Asperger
Así o cren os expertos que este sábado participan na Fundación María José Jove nunha xornada organizada por Asperga.
O mal uso das redes sociais nunha etapa de "especial vulnerabilidade" como a adolescencia pode agravar as situacións de acoso escolar e illamento social das persoas con síndrome de Asperger.
Así o cren os expertos que este sábado participan na Fundación María José Jove da Coruña nunha xornada organizada por Asperga que, baixo o título "Asperger e adolescencia. Estratexias para adolescentes e familias", pretende abordar aspectos como o bullying, a sexualidade ou o uso das redes sociais nunha etapa "xa de por si complexa para a maioría das persoas, pero aínda máis para aquelas que presentan un trastorno do espectro autista".
Exposta cun enfoque moi práctico, esta actividade congregou a máis de 70 persoas, entre as que se contan mozas con síndrome de Asperger, familias e educadores.
Verónica Santiso, directora de Asperga, incidiu na necesidade de "dotar aos propios adolescentes e aos educadores daquelas estratexias" que lles permitan "abordar os obstáculos desta etapa de maneira satisfactoria".
Entre un 60 e un 90 por cento dos escolares con Asperger sufriu algún tipo de acoso escolar, fundamentalmente entre os 11 e os 14 anos. Isto vese empeorado, apuntan os expertos, pola mala utilización das novas tecnoloxías, que tamén pode contribuír a agravar o illamento social.
SEXUALIDADE
Outro dos temas tratados no transcurso das xornadas foi a sexualidade, da man da sexóloga Emma Placer Noriega, especializada no asesoramento acerca da sexualidade no ámbito da diversidade funcional.
No seu relatorio tratou de fomentar actitudes saudables e desmitificadas sobre a sexualidade nas persoas con diversidade funcional, abordando aspectos tan importantes como as emocións e a afectividade, a promoción da saúde sexual ou a protección dos abusos.
Este relatorio complementouse cun taller práctico, impartido por dúas psicólogas do equipo terapéutico de Asperga, Lucía Menéndez e Rocío Salgado, centrado na afectividade e a sexualidade para mozos e mozas con síndrome de Asperger.
Escribe o teu comentario