Noventa minutos para non espertar do soño europeo

O Celta xógase esta noite pasar de rolda na Europa League, convencido de que é posible. É a idea que Berizzo inculcou no equipo, mesmo desde antes de caer por 0-1 en Balaídos. Ademais, o frío inverno ucraíno parece que non se cebará demasiado cos vigueses.

A receita será previsiblemente a mesma que o Celta vén buscando en cada eliminatoria, presionar, atacar e marcar. Esas son as fortalezas dos celestes. A principal ameaza, igual que na ida, as contras brillantes do Shakhtar.

Os ucraínos defenden o seu gol de vantaxe recuperando a Stepanenko, un dos seus pesos pesados no centro do campo, que estaba sancionado na ida. Será, en teoría, a única novidade nun once continuista.

Aos celestes espéraos un campo cheo, cunha afección famenta de fútbol por culpa da guerra. Se conseguen a machada, sería a quinta vez que o Celta alcanza os oitavos da segunda competición europea.