Os reclusos en Galicia sofren "impedimentos" para acceder a fármacos da hepatite C

A Plataforma Galega de Afectados pola Hepatite C e a Agrupación Avogados Novos de Vigo volveron a denunciar que os reclusos de centros penais de Galicia sofren a "privación dun dereito básico, como é o dereito da saúde", ao ter "impedimentos" para poder acceder aos novos fármacos para a hepatite C.

Tal e como comunicaron estes colectivos, tras manter unha reunión sobre este tema, dos 654 reclusos de Galicia afectados pola hepatite C, o número de pacientes tratados "apenas excede a decena en máis dun ano".

En relación a iso, criticaron que o convenio entre a Consellería de Sanidade e o Ministerio do Interior para o tratamento destes pacientes "só deixa en mans dos facultativos do Sergas a prescrición, reservando a dispensación dos tratamentos a Institucións Penais". "Isto dificulta o control e seguimento desas prescricións facultativas", censurou.

VULNERACIÓN DE DEREITOS

As dúas organizacións cualificaron esta situación de "inaceptable" por supoñer "unha vulneración dos dereitos fundamentais" dos presos, e apuntaron que "detrás deste sistema de acceso escóndese unha vontade deliberada de reducir o número de medicamentos efectivamente dispensados ao mínimo posible, con fins exclusivamente orzamentarios".

Ante todo iso, comprometéronse a elaborar unha estratexia conxunta para solucionar este problema, que consideran "moi grave e perentorio", e esixir que se execute "con urxencia" a transferencia das competencias en materia de saúde penal á Xunta para que os reclusos accedan aos servizos sanitarios nas mesmas condicións que o resto de cidadáns.

Finalmente, tamén deseñarán accións de información e presión neste sentido e reclamarán que se dispoña unha dotación orzamentaria e de medios "suficientes" para afrontar esta situación "en tanto esa transferencia non se efectúe".