A ourensá Rocío de Frutos doa a iniciativas sociais o diñeiro da súa sanción
O PSOE impúxolle 600 euros de multa por manter o 'non' na investidura de Rajoy e un grupo de militantes fixo unha colecta.
A deputada do PSOE no Congreso por Ourense, Rocío de Frutos, decidiu destinar a iniciativas sociais os fondos recadados por un grupo de militantes socialistas para pagar a súa sanción por romper a disciplina de voto na investidura de Mariano Rajoy.
En concreto, un grupo de militantes decidiu realizar unha achega de catro euros por cabeza para compensar á parlamentaria polos 600 euros que lle custou manter o 'non' a Rajoy.
Con todo, segundo fontes socialistas consultadas por Europa Press, a ourensá optou por asumir coa súa nómina do Congreso o pago imposto e doar o recadado polos seus compañeiros de filas.
Así, este mesmo luns entregou ao Comité Antisida de Ourense a metade desta contía, mentres que a parte restante recaerá noutra organización de carácter social.
Escribe o teu comentario