Malestar e desconfianza en Galicia polo novo atraso do AVE

A viceportavoz parlamentaria do PSdeG, Patricia Vilán, considerou este mércores "irreal" o novo prazo ofrecido polo Ministerio de Fomento para a chegada do AVE a Galicia. "Como mínimo será 2022", dixo, contradicindo así a estimación de 2019, pois "non se inclúe" o tramo Taboadela-Ourense.

Así o dixo ao ser preguntada en rolda de prensa sobre o resultado da reunión mantida o martes entre o presidente da Xunta, Alberto Núñez Feijóo, e o ministro do ramo, Íñigo de la Serna.

Ademais, a dirixente socialista incidiu en que supón "un escándalo" que o mandatario autonómico "asuma calado" este "novo atraso", para cuestionar con iso que tal vez Feijóo non ten tanto "peso político" no PP a nivel estatal.

Tamén no que respecta á chegada do tren de alta velocidade a Galicia, a presidenta da xestora do PSdeG, Pilar Cancela, anunciou que esixirá ao Goberno desde o seu escano no Congreso que aclare "se Galicia terá un AVE real ou un sucedáneo, sen todos os tramos terminados e cunhas características de vía" diferentes.

"SERÁ EN 2022"

O portavoz parlamentario de En Marea, Luís Villares, pola súa banda, censurou este mércores "o servilismo" do presidente da Xunta ao aceptar "os prazos e as condicións" impostos por Fomento. "A crónica dunha rendición anunciada", resumiu Villares, en rolda de prensa, a reunión entre o titular de Fomento, Íñigo de la Serna, e Feijóo, ao que considerou "un bo subordinado" de Génova.

Máis aló das críticas á postura do mandatario autonómico, o maxistrado en excedencia tamén cargou contra o "engano flagrante" que supón comprometer a alta velocidade ferroviaria para 2019. "Non é verdade, será en 2022", sostivo, coincidindo coa estimación do PSOE, á vista de que se excluíron do calendario os 17 quilómetros entre Ourense e Taboadela.

QUE PIDA "PERDÓN"

A portavoz nacional do BNG, Ana Pontón, esixiu ao presidente da Xunta que pida "perdón aos galegos en relación coas mentiras do AVE nos últimos anos". "A este paso imos ver antes como os humanos chegamos a Marte que a ter AVE en Galicia", sentenciou Pontón, quen recriminou a Feijóo que "trae a foto da mentira" da súa reunión en Madrid co ministro de Fomento.

Respecto diso, lembra que nas últimas campañas electorais Feijóo dicía que "se gañaba o PP teríase o AVE en 2016", pero confirmouse como "unha gran mentira", nun prazo que agora volve aumentar. "Os galegos non merecemos o enésimo atraso", lamentou.

Así, pide a modernización do ferrocarril en Galicia sen que haxa máis atrasos, pois "é mentira que en Galicia haxa AVE, de momento só hai alta velocidade nalgún tramo", polo que ve "fundamental" que todo o percorrido teña "dobre vía e electrificación". "E que non nos vendan un tren de segunda!", deixou claro Pontón.

VIGO, IGNORADO

O alcalde de Vigo, Abel Caballero, arremeteu este mércores duramente contra Núñez Feijóo e contra o ministro de Fomento por ignorar a cidade olívica no seu encontro para abordar (entre outras cuestións) a chegada da alta velocidade ferroviaria a Galicia, á vez que acusou directamente ao presidente galego de paralizar a obra da estación de Vialia como "represalia política".

Por outra banda, con respecto á chegada do AVE a Galicia, lamentou que o encontro entre Feijóo e de la Serna fose "para falar só do AVE ao Norte de Galicia", e que non se avanzou en nada acerca da conexión Vigo-Madrid por Cerdedo, a pesar de que a urbe olívica é "a máis importante" da comunidade.

OURENSE, "VIXIANTE"

O alcalde de Ourense cualificou este mércores como "positiva" a folla de ruta fixada en Madrid. Así, Jesús Vázquez agradeceu ao ministro "a súa claridade" ao falar das obras e pediu "que se cumpran os compromisos" alcanzados durante este encontro. Neste sentido, confirmou que se manterá "vixiante" para que se cumpra a promesa da chegada da Alta Velocidade á cidade a través da variante exterior.

Tras a reunión mantida en Madrid, De la Serna e Núñez Feijóo informaron de que o AVE chegará a Galicia a finais de 2019 e estará uns meses "en fase de probas". Para cumprir con este prazo, a entrada do tren en Ourense producirase temporalmente a través da vía actual, que será reformada para iso, á espera de que se poidan executar as obras da variante exterior.

"Cónstame que o ministro ten presente a variable exterior de Ourense e a necesidade de adxudicala", sinalou Vázquez, que tamén confirmou que a cidade "non vai renunciar nunca nin a negociar a variante".