Fomento atrasa a chegada do AVE a Galicia ata verán de 2019

Feijóo viaxou a Madrid en busca dun calendario "máis concreto" sobre a chegada a Galicia do AVE coa Meseta. Concretamente, será un ano máis tarde do compromiso que había ata agora. Íñigo de la Serna pon o límite no terceiro trimestre de 2019, aínda que estará en probas "durante uns meses"

Así o confirmou o ministro de Fomento trala reunión con Feijóo na que, entre outras cuestións, tiñan previsto fixar unha data nova para a alta velocidade galega.

En concreto, a circulación dos trens de comprobación alcanzará o tramo entre a localidade de Taboadela e a cidade de Ourense --onde non hai vía de AVE--, despois de que finalicen as obras do tramo que conectará con Pedralba de la Pradería (Zamora) e enlazará Madrid e Galicia con alta velocidade ferroviaria.

O ministro de Fomento revelou tamén que o tramo de AVE entre Zamora e Pedralba de la Pradería, que permitirá reducir 30 minutos o traxecto ferroviario entre a capital española e Galicia, estará "completamente finalizado" e "en condicións de poñer a disposición o servizo" a finais do ano 2018.

UNHA XUSTIFICACIÓN DE NOVOS ATRASOS

En Marea, PSdeG e BNG coincidiron pola tarde ao mostrar a súa preocupación sobre a posibilidade de que trala súa reunión co ministro de Fomento, Íñigo de la Serna, o presidente da Xunta, Alberto Núñez Feijóo, "xustifique" novos atrasos para a chegada do AVE a Galicia. Fronte a iso, o PPdeG confiou en que do encontro que se celebrou esta tarde saíse "un prazo real" que teña en conta as "circunstancias técnicas" e "a capacidade do Goberno para actuar".

A primeira en comparecer ante os medios foi a líder do BNG, Ana Pontón, quen vaticinou que Feijóo foi a Madrid para "ser o mensaxeiro da mala noticia" de que Galicia terá "un ave de segunda".

"A nós non nos valen as escusas de Feijóo. O Goberno do Estado tiña os orzamentos aprobados e non os executou. Por tanto, hai unha irresponsabilidade xa que non era un problema de falta de dotación orzamentaria senón da fraude duns orzamentos do PP que consignan partidas que despois non se executan", apuntou.

Trala intervención de Pontón, o portavoz parlamentario dos socialistas galegos, Xoaquín Fernández Leiceaga, augurou que "vendo como evolucionan os acontecementos", co "desfile de novas datas, pretextos e desculpas" para a chegada do AVE a Galicia, o presidente de Xunta sairá do encontro "cun atraso parcial e en diferido". "Ademais, non van completar o tramo Taboadela - Ourense - Empalme", apuntou.

Pola súa banda, o portavoz parlamentario de En Marea, Luís Villares, considerou que Feijóo vai á capital do Estado a "recibir instrucións, do mesmo xeito que cando o ministro" estivo en Galicia.

O último en comparecer ante os medios foi o portavoz parlamentario do PPdeG, quen asegurou que "non é malo que o Goberno da Xunta teña unha interlocución co ministro de Fomento para falar daquelas infraestruturas que teñen importancia para o país e que son competencia" do Estado.