A muller asasinada no Carballiño foi estrangulada

A autopsia preliminar da muller asasinada esta fin de semana no Carballiño (Ourense), un caso polo que permanece detido o seu marido, confirmou que a vítima foi estrangulada.

Así o avanzaron fontes do Tribunal Superior de Xustiza de Galicia (TSXG), que apuntaron que xa se fixo cargo da investigación o Xulgado de Instrución numero 2 do Carballiño, que é o competente en casos de violencia sobre a muller.

Polo momento, con todo, descoñécese cando e como se producirá o paso a disposición xudicial do detido, marido da vítima, que permanece ingresado no hospital.

O crime coñeceuse o domingo, despois de que uns familiares da muller asasinada desen a voz de alarma despois de que esta non acudise a unha cita que tiña concertada con eles.

Axentes de Garda Civil e Policía Local desprazáronse entón á vivenda do matrimonio, na rúa Alexandre Bóveda do Carballiño, á que accederon a través dun vehículo disposto polo servizo de emerxencias, entrando por unha xanela do primeiro piso, e localizaron o cadáver da muller.

O marido da vítima foi achado na vivenda con lesións por arma branca autoinflixidas, que non resultaron mortais. O home, de 59 anos, foi derivado en primeira instancia ao centro sanitario do Carballliño e, posteriormente, trasladado ao CHUO, onde permanece ingresado na unidade de agudos en calidade de detido.

A Delegación do Goberno informou este luns de que non constan denuncias por malos tratos por parte da muller asasinada, aínda que si "intervencións policiais previas" en relación ao presunto homicida.