Constituída a comisión de investigación das caixas

A comisión de investigación da evolución económico-financeira das antigas caixas de aforros galegas foi constituída este luns co obxectivo de terminar os traballos iniciados por este mesmo órgano na pasada lexislatura.

Este órgano estará presidido pola parlamentaria popular Marta Rodríguez Arias e terá como vicepresidenta á tamén deputada do PPdeG Cristina Romeu. Pola súa banda, José Manuel Lago (En Marea), será o secretario.

Participarán na comisión, por parte do Partido Popular de Galicia, o seu portavoz parlamentario, Pedro Puy, así como os deputados Martín Fernández Prado, José González Vázquez, Teresa Ejerique e Guadalupe Murillo.

Ademais de José Manuel Lago, participará nesta comisión Antón Sánchez de En Marea; mentres que polo PSdeG estarán Xoaquín Fernandez Leiceaga e Abel Losada. O BNG, pola súa banda, estará representado pola súa líder, Ana Pontón.

A constitución deste órgano prodúcese despois de que a pasada semana ingresasen en prisión catro exdirectivos de Novagaliciabanco e un avogado condenados por apropiación indebida en relación ás indemnizacións cobradas.