Máis de 500 traballos de escolares compiten por ser os mellores 'Relatos de auga intelixente'
A entrega de premios desta terceira edición do Certame Literario de Viaqua celebrarase en torno ao 22 de marzo, Día Mundial da Auga.
Un total de 561 microrrelatos escritos por escolares presentáronse ao III Certame Literario 'Relatos de auga intelixente' convocado por ViAQUA. O prazo de recepción dos traballos pechou o 31 de decembro, unha vez terminado o primeiro trimestre o alumnado de ESO e Bacharelato/FP, a quen estaba dirixida a convocatoria deste concurso.
Tal e como informa a entidade nun comunicado, "a participación dos escolares incrementouse ata case duplicar" a participación anterior. Nesta edición rexistraron "un 46,2% de aumento de traballos durante o primeiro trimestre" e, "con respecto á primeira edición, no curso 2014-15, este incremento chega ao 81,6%".
O certame literario está dirixido a alumnos e alumnas de entre 12 e 17 anos dos centros educativos galegos nos que ten presenza a marca ViAQUA como empresa da xestión da auga. O seu obxectivo é "contribuír á difusión da cultura da auga e implicar os escolares no seu uso sustentable e o coidado do medio ambiente" a través da literatura.
OS PREMIOS, EN TORNO AO DÍA DA AUGA
O xurado do concurso está integrado por "persoas vinculadas á creación literaria e outros porfesionales do ámbito da auga e do medio ambiente". Durante o mes de febreiro determinarán os traballos vencedores nas dúas categorías. Logo, as entregas de premios aos dous gañadores celebraranse "nos días próximos ao 22 de marzo, Día Mundial da Auga". A empresa informa de que "tamén recibirá un recoñecemento especial o centro escolar que maior participación dos seus alumnos rexistre".
Escribe o teu comentario