Galicia confía en salvar o veto a debater en Madrid sobre a AP-9

|

Autoestrada 1


"A maioría da produción de riqueza" en Galicia lévase a cabo "a menos de 20 quilómetros da AP-9". Con esta sentenza contundente defende Leiceaga que a comunidade consiga o traspaso de titularidade da autoestrada.


O portavoz parlamentario do PSdeG mostrouse "seguro de que esta vez" se tramitará no Congreso a proposición de lei que pide o traspaso a Galicia da titularidade da Autoestrada do Atlántico (AP-9).


En declaracións aos medios en Ordes (A Coruña), onde acudiu a presentar as emendas aos orzamentos da Xunta para esta comarca, Leiceaga comentou "a boa noticia" que supón asinar entre todos os grupos parlamentarios un novo texto lexislativo que salve "o veto" imposto polo Goberno central.


Era, segundo dixo, "un veto político" pero que atopaba o seu "fundamento" nunha "maña regulamentaria" sobre a influencia da proposición de lei nos orzamentos estatais. Os cambios introducidos fanlle estar "seguro" de que poderá discutirse na Cámara baixa sen ningún impedimento.


De lograr a transferencia, proseguiu o dirixente socialista, será a Xunta e non o Goberno central a que poida sentar "directamente" coa concesionaria para negociar melloras nos accesos e cambios na política de peaxes.


"É CENTRAL"


"Desde a proximidade faise mellor", defendeu, co argumento de que para o Ministerio de Fomento pode non ser importante racionalizar as peaxes pero para Galicia "é central". A modo de exemplo, explicou que actualmente é máis barato levar produtos desde O Bierzo á Coruña que facelo desde O Salnés, tendo en conta que os empresarios deben asumir a peaxe duunha "estrada cara".


MENOS ARGUMENTOS PARA O 'NON'


O presidente da Xunta, Alberto Núñez Feijóo, mostrouse convencido de que, coa redacción da nova proposición de lei, o Goberno central ten "menos respostas" para dicir "non" á petición galega, á vez que agradeceu que a oposición vaia "clarificando" a súa postura para "non enganar os cidadáns".


"Os partidos aceptan que a AP-9 siga sendo unha autoestrada de peaxe, inevitablemente. Hai un contrato asinado e o que se discute non é o réxime concesional, nin enganar os cidadáns para dicir que se se transfire a AP-9 deixarán de ter peaxe", aseverou, na rolda de prensa posterior ao Consello da Xunta.


A preguntas dos xornalistas, agradeceu o que definiu como un exercicio de "sinceridade" que "cada vez se vai concretando máis" por parte dos seus rivais políticos, sobre todo de "un", en alusión ao BNG, aínda que non o mencionou, e incidiu en que a iniciativa constata que "o que se discute é a titularidade e non a explotación".


SORTEAR O VETO


Os catro grupos con representación no Parlamento de Galicia rexistraron este mércores unha nova proposición de lei para solicitar a transferencia da titularidade da Autoestrada do Atlántico e as competencias sobre o réxime xurídico da concesión.


Trátase dun novo texto acordado por PPdeG, En Marea, PSdeG e BNG, subscrito polos 75 deputados da Cámara --entre eles, Alberto Núñez Feijóo, e os seus 10 conselleiros (que tamén son parlamentarios)--, no que se eliminan as cuestións que motivaron o veto por parte do Goberno ao seu debate no Congreso o pasado mes de outubro.


En concreto, retirouse o prazo máximo de seis meses para o traspaso efectivo da citada autoestrada e ponse por escrito --nunha disposición adicional-- que o cambio de titularidade non supoñerá ningún incremento dos créditos nin diminución dos ingresos previstos nos orzamentos estatais en vigor.


EVITAR ESCUSAS


O portavoz parlamentario de En Marea, Luís Villares, esixiu ao Partido Popular que "defenda o mesmo" en Madrid que En Galicia e que dea luz verde á transferencia da titularidade da Autoestrada do Atlántico, AP-9.


"Se facemos isto é para que non haxa escusas", reiterou Villares, que deixou claro que En Marea "defenderá o mesmo en Galicia e que en Madrid". "Xa basta de humillacións da posición de país que fixo Feijóo pola debilidade que ten fronte ao seu propio partido no Parlamento español", manifestou.


Con todo, o portavoz parlamentario de En Marea asegurou que a súa formación "non renuncia" a seguir reclamando "nun futuro" o rescate "para o público da AP-9".

relacionada Os grupos do Parlamento rexistran unha nova proposición de lei para o traspaso da AP-9

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress