(VÍDEO) Non é un paxaro, non é un cetáceo, o que sobrevoou Vigo é un avión con forma de beluga
A rechamante aeronave de Airbus fixo voos de proba esta mañá no Aeroporto Internacional de Vigo-Peinador.
A peculiar aeronave de Airbus fixo voos de proba esta mañá no Aeroporto Internacional de Vigo-Peinador.
A rechamante constitución do aparello espertou moitos comentarios de vigueses que afirman ver un inusual cetáceo no ceo.
Se o que parece, pero non, non lle saíron ás ás belugas, que seguen tan tranquilas nadando nas frías augas do Ártico. Algún vigués afirmará ver unha hoxe sobrevoando a súa cidade, e non lle faltará razón, pero o que viu foi unha curiosa aeronave que estivo a dar voltas á cidade olívica e realizando aterraxes e despegamentos no Peinador.
A Beluga XL, como se coñece a este modelo da compañía Airbus, estivo a facer probas no aeroporto vigués e na súa contorna. O seu tamaño -63 metros de longo por 60 de envergadura- e o seu deseño -parece tal cal unha beluga ou un dos arroaces que brincan polas rías galegas- son o máis rechamante deste transporte, que fixo que moitos sacasen a pasear a cámara para captalo en pleno voo.
Airbus realizou varios voos de proba no aeródromo de Vigo, como o voo do A-350 en 2019. Pero o voo do Beluga XL, chegado desde Toulouse, foi o que espertou máis expectación, aínda que non se trate dun avión de pasaxeiros, senón que o seu fin sexa o de transportar mercadorías. Aínda que a algúns lle custou identificalo.
Cuns ollos pintados a cada lado, co morro asemellando un fuciño e coa cabina debuxando unha especie de boca, o Beluga espertou a simpatía de moitos usuarios que compartiron as súas instantáneas ou apreciaron o rechamante desta rápida visita.
Escribe o teu comentario