Núñez Feijóo aínda non se instalou na rúa Xénova e xa cometeu dous graves erros ao permitir a Gamarra a súa intervención no Congreso, pero sobre todo por ter a “honra” de dar entrada, por primeira vez, á extrema dereita - retrógrada- nun goberno

Estaba cantado que o PP de Alfonso Fernandez Mañueco ía pactar con Vox se quería seguir sendo presidente de Castela e León. Alguén o dubidaba? Como a pregunta sobra, finalmente, este xoves, o pacto PP-VOX foi selado para escándalo dos partidos da oposición que cualificaron como moi grave que Vox entre no goberno e que ademais consiga a presidencia das Cortes. Xa llo deixou moi claro Abascal a Mañueco: “Queremos o mesmo que o PP concedeu a Cidadáns no anterior mandato: a presidencia das Cortes, a vicepresidencia do goberno e tres consellerías” sen determinar as áreas.

Faltaba menos dunha hora para iniciar a sesión nas Cortes, cando finalmente as dúas formacións chegaron ao acordo. Queda aínda por concretar o programa de goberno co que van executar o seu mandato. Un documento que non vai ser fácil se se le detidamente os programas electorais que presentaran os dous partidos na campaña electoral e onde son evidentes as diferenzas entre eles. Non será fácil, pero hai un tema que lles une: o poder.

É a primeira vez na historia de Europa que se dá entrada a un goberno da ultradereita. Unha decisión incomprensible, mesmo para o líder do Partido Popular Europeo que criticou a decisión dos seus colegas españois e chegou a declarar que non entende o movemento. O tema traerá cola.

Aínda non chegou a presidir o PP Alberto Núñez Feijoo e nunha mesma semana cometeu dous erros de vulto que poñen en dúbida a imaxe que lle acompañou ata o de agora. Este mércores, na sesión de control ao goberno, no Congreso, a portavoz dos populares, Cuca Gamarra, cunhas formas máis pausadas, pero cun fondo máis que discutible, acusou o presidente do goberno, Pedro Sánchez, de que “primeiro utilizou a pandemia e agora está a utilizar a guerra”. Unha afirmación que o indignou, o mesmo que a todo o seu grupo. Las palabras de Gamarra foron cualificadas de intolerables, indecentes, e os socialistas esixiron ao PP unha rectificación urxente, que a día de hoxe non se produciu, nin creo que se produza.

Pero se non houbese suficiente balbordo, ao día seguinte produciuse o acordo de goberno en Castela e León. Pacto que se realizou co consentimento de Feijóo. Así o recoñecía horas despois o mesmo Casado cando, nunha reunión en Bruxelas para despedirse dos seus compañeiros de grupo no Parlamento Europeo, veu dicir que con el non se levou a cabo o pacto. Cargaríanllo tamén por non querer pactar con Vox?

Sexa como sexa, Núñez Feijóo aínda non se instalou na rúa Xénova e xa cometeu dous graves erros ao permitir a Gamarra a súa intervención no Congreso, pero sobre todo por ter a “honra” de dar entrada, por primeira vez, á extrema dereita - retrógrada- nun goberno que preside o seu partido.

Concepción Arenal, unha galega inesquecible, xurista, escritora, feminista e precursora dos servizos sociais en España dicía: “O erro é unha arma que acaba sempre por dispararse contra o que a emprega”. É unha frase que debe facer reflexionar a Feijóo se non quere terminar coa súa imaxe de persoa “moderada” en pouco tempo.

O presidente da Xunta de Galicia, Alberto Núñez Feijóo asina a entrega dos avais necesarios para formalizar a súa candidatura na sede nacional do PP, na rúa Xénova, ao 9 de marzo de 2022, en Madrid (España).