Manifestación no Obradoiro de #DefensaTurnoLibre para reclamar a retirada da reforma sobre a iterinidad

A capital galega acolleu onte unha manifestación da plataforma de opositores contra a reforma que afecta a todas as administracións públicas.

"Miles de persoas que estiveron estudando para conseguir unha praza quedarán sen un traballo estable e digno", denuncian. 

Quenda Libre | Foto: EP

A plataforma de opositores Quenda Libre manifestouse este sábado na Praza do Obradoiro de Santiago de Compostela para esixirlle ao Goberno que dea marcha atrás á reforma sobre a interinidade nas administracións públicas.

A manifestación, na que participaron decenas de persoas con arengas como "Administración por oposición" ou "A quen estuda o Goberno non axuda", estivo acompañada de membros doutras plataformas de opositores como Docentes pola Xustiza.

Os manifestantes aseguraron que a reforma do Goberno que pretende reducir a interinidade en España, é "unha medida para acceder aos fondos europeos" e que "non se pode ter administracións públicas de calidade se os empregados públicos non pasan os méritos que se requiren".

Unha das principais denuncias da plataforma é a de que "miles de persoas que estiveron estudando para conseguir unha praza quedarán sen un traballo estable e digno" á conta doutras que, segundo consideran, non tiveron que cumprir cuns requisitos igual de esixentes.

Ademais, a plataforma insistiu en que representan a opositores de distintas administracións e con diversas condicións. Nesta liña, durante o acto interviñeron distintos membros de Quenda Libre para exemplificar esta diversidade, como un home que leva máis dun ano como interino, ou unha muller de mediana idade con fillos e un traballo á marxe da oposición.

Con isto, a plataforma quixo denunciar a "mitificación" dos opositores como xente nova e dependente dos seus pais. Así mesmo, aseguraron que entre os estudantes dunha oposición existe moita xente que ve prexudicada a súa vida social e familiar polas horas dedicadas a preparala e que o Goberno "os deixa de lado".

APOIO DOUTROS OPOSITORES

Durante o acto, os organizadores insistiron en que esta situación afecta a estudantes de moitos ámbitos e que "loitan tamén por futuros opositores". Entre os opositores a distintas administracións, estiveron presentes membros de Docentes pola Xustiza, que se manifestarán o vindeiro domingo en Madrid en contra da reforma dos requisitos para acceder á docencia

"Queren facer un concurso no que non haxa que facer exame, que regalen as prazas a xente con máis de cinco anos de experiencia" afirmou un dos membros de Docentes pola Xustiza.

A plataforma de opositores a Educación quixo mostrar o seu apoio á defensa da quenda libre e insistiu en que a medida do Executivo "deteriorará" a calidade das administracións.