Luz verde do TSXG para prohibir as reunións en espazos públicos e privados entre as 3 e as 6

O Tribunal Superior de Xustiza de Galicia deu o visto e prace á Xunta para prohibir as reunións de non conviventes de madrugada polos altos contagios desta sexta onda. 

Durante tres horas, e ata o 18 de xaneiro, quedarán prohibidas desde esta media noite as reunións en público e privado de persoas non conviventes entre as 3 e as 6 da mañá.

A Xunta pon en marcha o 'toque de non queda' desde esta media noite | Foto: EP

O Tribunal Superior de Xustiza de Galicia (TSXG) autorizou á Xunta a prohibir as reunións entre non conviventes, en espazos públicos e privados, entre as 3,00 e as 6,00 horas, desde as 00,00 horas do día seguinte ao da publicación da orde no Diario Oficial de Galicia (DOG) e ata as 00,00 horas do 18 de xaneiro.

A Sección Terceira da Sala do contencioso-administrativo tamén permite á Xunta ampliar a todo o horario de apertura o requisito de presentar o certificado de vacinación de proba diagnóstica negativa de covid-19 para acceder ao interior dos establecementos hostaleiros.

Os xuíces do alto tribunal galego entenden que a adopción destas medidas está xustificada polo "relevante risco" de transmisión do virus que existe en Galicia.