AMICOS contará coa axuda da Deputación da Coruña para ampliar a súa residencia de Boiro

A ONG dirixida por nais e pais de persoas con discapacidade  do Barbanza atende a centenares de usuarios, algúns dos cales viven a tempo completo na residencia de Comoxo, Boiro.

O presidente da Deputación da Coruña, Valentín González Formoso, comprometeu o apoio do organismo provincial para o proxecto de ampliación da residencia para grandes dependentes AMICOS, en Boiro, que ten unha ocupación do 100%.

Fíxoo na visita ás instalacións do centro de atención integral, acompañado polo alcalde, José Ramón Romero; as deputadas de Educación e Benestar Social, Sandra González e Ana Lamas, onde foron recibidas pola presidenta da entidade, Esther Vidal, e outros representantes.

Nela, explicáronlle os diferentes programas e servizos que ofrecen nos seus centros a máis de 600 persoas con diversidade funcional nunha zona xeográfica que vai desde Vilagarcía ata Outes.

"UN MODELO A SEGUIR"
En visita, Formoso destacou que AMICOS é "unha referencia en innovación social en Galicia" e representa "un modelo para seguir para o futuro das entidades sociais". "Polo que temos que seguir investindo e apoiando en todo o que podamos no labor que desenvolven no ámbito social", apostilou.

Noutra orde de cousas, o presidente provincial e o alcalde de Negreira, Manuel Ángel Leis, supervisaron o inicio dos traballos da segunda fase das obras de ampliación da estrada Negreira- Pontenafonso, que estarán terminadas a finais do próximo ano.