Galicia confirma xa unha ducia de casos da variante ómicron ao sumar outros tres na área de Vigo​

O avance de casos de Covid-19 vinculados á coñecida como cepa surafricana é cada vez máis notorio na comunidade, ao confirmar o SERGAS tres novos casos que elevan a doce a cifra de afectados. 

"Hai que lanzar unha mensaxe de preocupación co desenvolvemento desta variante de maneira rápida", afirma o conselleiro de Sanidade, Julio García Comesaña. 

Julio García Comesaña | Foto: EP

Os casos da variante ómicron elévanse a 12 en Galicia, tras confirmarse tres novos na área de Vigo, segundo informou o conselleiro de Sanidade, Julio García Comesaña, nunha comparecencia ante os xornalistas na visita ao centro de saúde de Vos Mallos.

Estes tres novos positivos súmanse aos nove confirmados nas últimas horas, deles seis na área sanitaria da Coruña e Cee e outros tres tamén na de Vigo.

Os dous primeiros casos desta cepa -- uno deles, dunha persoa que viaxara a África-- foron anunciados o pasado venres polo presidente da Xunta, Alberto Núñez Feijóo.

"A variante avanza", recoñeceu o conselleiro, quen, por iso, considerou que hya que estar "máis atentos". "Hai que lanzar unha mensaxe de preocupación co desenvolvemento desta variante de maneira rápida", admitiu, apelando, para reducir contagios, á responsabilidade individual.