Oito detidos, unha menor incluída, pola pelexa na zona de pubs na fin de semana en Monforte

A Policía Nacional de Monforte (Lugo) detivo a oito persoas implicadas nunha liorta rexistrada a pasada fin de semana neste municipio, dos cales unha é menor de idade. Con estes arrestos considera finalizada a investigación.

Segundo informou a Policía Nacional, este mércores e xoves pasado foron detidas oito persoas, catro homes e catro mulleres, pola súa suposta participación nas lesións sufridas por cinco novos da localidade. Os feitos ocorreron na madrugada do pasado sábado nunha coñecida rúa de lecer nocturno de Monforte.

As vítimas acudiron para recibir asistencia das lesións ao Hospital Comarcal de Monforte, unha das cales foi derivada ao Hospital Teresa Herrera da Coruña con lesións graves, destaca a Policía Nacional.

A investigación realizouse, subliña a Policía, "no menor tempo posible", ao ter coñecemento os axentes de que "entre mozos da cidade circulaba o rumor dunha posible resposta violenta por parte das vítimas", feito que foi descartado polos investigadores, aínda que, engade, "procurouse a rápida identificación de todos os implicados para evitar calquera tipo de consecuencia que puidese xerar novos incidentes violentos".

Para garantir a prevención e mantemento da seguridade cidadá nas zonas de lecer nocturno, xunto cos axentes da Comisaría de Policía Nacional, colaboran tanto o Corpo da Policía Local de Monforte, como a Unidade de Policía Nacional adscrita á Comunidade de Galicia, explican as mesmas fontes.