Galicia reconquistará mañá o risco baixo de coronavirus pola caída da incidencia semanal

Os 101 novos positivos por PCR comunicados hoxe serven para manter á baixa os indicadores semanais e bisemanais de contaxios. A velocidade da melloría segue sendo alta, aínda que aos poucos vai perdendo algo de brío.

Algo similar sucede cos casos activos. Continúan á baixa de maneira notable aínda que o seu descenso é cada vez un pouco máis leve. Algo lóxico e esperable, por outra banda, dous meses despois do último pico.

A incidencia acumulada semanal cae de 28 a 26 diagnósticos por cada 100.000 galegos á semana. Segundo os criterios do semáforo de alertas oficial, estamos a piques de reconquistar o risco baixo que tivemos durante boa parte da primavera. Para conseguilo debemos baixar de 25; o que, vista a evolución destes días, debería pasar mañá.

A incidencia acumulada a 14 días cae de 76 a 71. Son cinco puntos menos, unha baixada considerable pero inferior á de xornadas anteriores. Segundo os criterios do semáforo de alertas oficial, este indicador segue en risco medio. Queda treito para conquistar o risco baixo, pois hai que alcanzar os 50, aínda que parece factible conseguilo este mes. 

O dobre da incidencia semanal (32) é menor que a incidencia bisemanal (71). En concreto, a razón de taxas resultante é 0,75. Isto indícanos que na última semana houbo un 25% menos de positivos que na penúltima. 

Sendo como é unha velocidade de melloría excelente, é algo inferior á que chegamos alcanzar hai uns días, que foi mesmo de -30% semanal.

A taxa de positividade onte foi do 3,4% das 2.629 PCRs. O SERGAS fai cada vez menos probas sen que isto provoque unha subida da proporción que dá positivo. De feito, a media semanal ponse en un 3,3%, que é o mellor índice desde que impactou a quinta onda. 

EVOLUCIÓN DOS CASOS ACTIVOS

O total de infectados descende hoxe un -6,6%, que é á vez un gran rexistro pero o segundo peor  na última semana. A media semanal, o indicador máis relevante, deixa de avanzar polo bo camiño e achégase a cero. Iso si, o seu valor, -7,3% segue sendo excelente.

En termos absolutos, as porcentaxes de hoxe equivalen a un descenso  -184 ,que deixa o total en Galicia en 2.580 casos activos. 

CONCLUSIÓNS

Con todas estas estatísticas sobre a mesa, podemos inferir que:

• A pandemia segue baténdose en retirada. Está a perder terreo a gran velocidade, aínda que xa non a pasos axigantados como pasaba hai uns días. Parece que o pico da melloría queda atrás ou o estamos aproximando.
• Significa estoque nos diriximos a un repunte ou a un aplanamento? Mirando a gráfica da derivada da evolución de casos activos podería deducirse isto, aínda que aínda é moi cedo para afirmalo cun mínimo de contundencia. Xa noutras ocasións a melloría pareceu titubear para despois recuperar velocidade de maneira sorprendente. 
• De maneira sorprendente porque non é normal unha fase de melloría tan prolongada como a actual, especialmente cando as restricións alívianse máis e máis. Esta inusual melloría tan prolongada sen restricións duras débese sen ningunha dúbida á alta taxa de vacinación, que en Galicia supera o 80%.
• Hai que asumir que un repunte de contaxios sucederá tarde ou cedo, dado que as vacinas non protexen ao 100% contra a infección e os menores de 12 non se están vacinando. Iso si, claro, canto máis tarde o repunte mellor, pois a inevitable subida partirá de niveis máis baixos. Canto máis baixo sexa o punto de partida do repunte, máis posibilidades haberá de que  o SERGAS sexa  capaz de trabar a subida sen recorrer a restricións, só trazando e illando os casos. 

DATOS POR ÁREAS

Vigo (34) e Lugo (22) son as áreas que máis positivos achegan hoxe ao cómputo galego (101). Con todo, o máis noticioso é que Ferrol consegue non reportar nin un só diagnóstico por terceira vez nesta semana.

En Ferrol, que nestas quinta ondas chegou a sufrir problemas na súa UCI, só queda un paciente crítico. En total, son 116 os hospitalizados en Galicia, 32 en UCI.