Máis restricións en Galicia: prohibición de reunións de máis de 6 non conviventes en interiores e 10 en exteriores

Cambados, O Barco, A Pobra, Meaño, Boiro, Sanxenxo e O Grove estarán en nivel máximo de restricións. En nivel alto estarán varias ducias de municipios, incluídas a cidades de Vigo, Pontevedra e Ourense. Ata hoxe, non había ningún municipio en nivel máximo de limitacións. 

Así o acaba de anunciar o presidente da Xunta en rolda de prensa tras a reunión do Comité Clínico de expertos do SERGAS. Concrétase así a temida subida de restricións ante o forte avance da pandemia. 

Limitacións que chegan, iso si, cando xa hai sinais de que estamos preto dun pico de contagios, e despois de que, sorprendentemente, la Xunta non tomase ningunha medida na súa anterior reunión, a do venres. O sábado o congreso PPdeG xuntou a 1.100 acudas en interiores en Santiago. O martes a Xunta prohibe que en interiores xúntense máis de 6 non conviventes.

Feijóo en rolda de prensa anunciando as restricións

O presidente da Xunta anunciou que para entrar en hostalería en concellos de nivel alto ou máximo haberá que acreditar pauta de vacina completa ou PCR negativa ou infección superada no últimos seis meses. 

NIN PECHES NIN PERIMETROS

Non haberá por agora ningún peche hostaleiro, a diferenza do que pasaba antes cos concellos clasificados en nivel máximo de restricións. Tampouco haberá ningún municipio perimetrado, por agora, nin ningún toque de queda xeral.

Nun concello con nivel máximo, o aforo hostaleiro será de 30% en interior e 50% en exterior.  O lecer nocturno seguirá pechado, pero só nos concellos en os niveis de restricións máximo e alto. 

ENTRADA EN VIGOR E LIMITACIÓNS DE REUNIÓNS

As medidas entrarán en vigor esta fin de semana. É dicir, ás 00:00 horas do sábado. 

En toda Galicia, quedan prohibidas as reunións de máis 6 persoas non conviventes en interiores e de 10 en exteriores.  Destes límites quedan exentas as reunións que sexan exclusivas de dúas unidades familiares. Así, por exemplo, poderían comer dúas familias de 4 persoas no interior dunha casa.

Ata o de agora estas restricións só eran unha recomendación. Agora é unha obrigación. En todo caso, os festivais e concertos en exteriores seguen adiante, pois a Xunta argumenta que son eventos controlados, con protocolos ad hoc.

Non hai toque de queda xeneral, pero da 1 ás 6 da madrugada quedan prohibidas as reunións de non conviventes nos concellos en nivel alto e máximo. Ademais, nos concellos en nivel medio e baixo, onde segue aberto o lecer nocturno, as reunións de non conviventes estarán prohibidas entre as 3,00 e as 6,00 horas. 

A CULPA? DE MONCLOA POR NON ENVIAR VACINAS

O presidente culpou das restricións ao Goberno de España por non proporcionar vacinas suficientes. Hai que ter en conta que España é o país líder da UE en vacinación e un dos mellores do mundo, superando en porcentaxe de poboación con pauta completa por exemplo a Estados Unidos, que empezou a vacinar moito antes.

"Necesitamos máis vacúas" insistiu o mandatario, que culpou a Moncloa da caída do ritmo de vacinación de xullo respecto a xuño. Feijóo vinculou directamente e en repetidas ocasións as novas limitacións co feito de que non hai vacinas suficientes para todos á vez. Ese foi o seu enxoval máis importante desde o punto de vista político.

Alberto Nuñez Feijóo recoñeceu que Galicia xa está preto da media de España de incidencia semanal, hai uns 30 puntos de diferenza. O presidente admitión que a situación empeorou con varios días seguidos de máis de 1.000 diagnósticos novos.

ALTÍSIMOS NIVEIS DE CONTAGIOS ENTRE Os MOZOS

Os grupos máis afectados por esta quinta onda son os mozos entre 12 e 29 anos. Nese grupo a taxa semanal supera os 1.000 casos por 100.000 habitantes.  É dicir, un de cada 100 mozos deu positivo nas últimas dúas semanas. 

O mandatario lembrou que a vacina non é totalmente eficaz para parar todas as infeccións. No mellor dos casos dixo que era do 90%. Polo tantou "hai netos que están a contaxiar aos seus avós". O presidente lembrou que, aínda que non moitas -en toda esta onda a penas hai unha decena de falecementos- en Galicia morreron persoas coa pauta de vacinación completa.

O líder conservador indicou que os expertos do SERGAS calcula que de manterse este ritmo de positivos, en dúas semanas chegariamos a 400 hospitalizados en planta, que é a cifra que precisamente estimou Galiciapress onte.

Feijóo criticou aos mozos polo botellón e porque lembrou que o 60% non está a acudir ás convocatorias de cribado. Isto alimenta unha taxa de positividade enorme, que á vez indica que a circulación real do virus pode ser moito maior da que nos contan as cifras.

O 65,6% dos galegos están vacinados, o 90% da poboación maior de 40 ten a pauta completa. A primeira dose para os menores de 30 empezará na semana do 26 ao 1 de agosto.

O aumento da vacinación é clave nesta batalla. O 80% dos contagios en Galicia está a ser de persoas de menores de 40 anos, que son precisamente as que menos vacúas recibiron.