Tres anos de cárcere para parella de perruqueiros de Lugo por fraude de cotizacións mediante sucesión de empresas

Os empresarios non pagaban á Seguridade Social e cando o fisco lánzaselles encima a compañía ía á quebra, pero pouco importáballes porque a empresa carecía de bens que poxar

No canto de pagar, fundaban outra empresa coa mesma actividade, dirección e ás veces mesmo daban de alta aos mesmos traballadores

Os perruqueiros no banco dos acusados /EP

Un matrimonio de perruqueiros de Lugo aceptou unha pena de tres anos e tres meses de cárcere por delitos cometidos contra a Seguridade Social, á que defraudarían case 480.000 euros entre os anos 2013 e 2016 con sociedades dedicadas ao salón de peiteado e a estética.

A LENTITUDE DA XUSTIZA FAVORECEULLES
En principio a fiscalía pedía catro anos para o home e sete anos de prisión para a muller, engadíndoselle a esta o delito de "frustración na execución" que vén ser unha especie de alzamento de bens.

Finalmente, o home aceptou un ano e oito meses polo delito contra a seguridade social, en tanto que a súa muller asumía nove meses de prisión por este delito e dez meses polo outro. En total tres anos e tres meses.

Esta rebaixa veu condicionada, explicaba a fiscalía na vista celebrada na Audiencia Provincial de Lugo, polas "dilacións indebidas".

DEBERÁN PAGAR MÁIS DUN MILLÓN
Ademais, ambos terán que abonar en concepto de responsabilidade civil subsidiaria máis de 480.000 euros e a devolución á Seguridade Social de 547.000 euros. Tamén se lles impuxo que durante catro anos non poderán optar a axudas da Seguridade Social.

Segundo a acusación pública, o modus operandi consistía en que cuando unha das sociedades que creaban acumulaba débedas coa Seguridade Social o que facían para non abonalas, xa que carecían de patrimonio propio, era crear outra empresa e así sucesivamente.

Estas sociedades tiñan idéntica actividade, salón de peiteado e estética; moitos dos seus traballadores pasaban dunha empresa a outra e a nova que creaban tiña o mesmo domicilio e mesmo se utilizaban os mesmos medios e instalacións que a que supostamente pechaban.