Catro meses de prisión a unha parella por branqueo de capitais no xuízo por unha das pezas da 'Carioca'

Ademais dos catro meses de prisión, os condenados, o dono de varios clubs de alterne e a súa parella sentimental, deberán asumir unha multa de 734.495 euros polo delito de branqueo de capitais. 

"Estamos a falar dun procedemento que se instrúe no 2008 e estamos en abril de 2021", critica o avogado dos acusados polas "dilacións indebidas" da causa que iniciou Pilar de Lara, sancionada polo CSPJ.

J.M.G.A., procesado nunha das pezas da 'Operación Carioca' | Foto: EP

O home J.M.G.A. e a que fose a súa parella sentimental K.L. aceptaron catro meses cada un de prisión e unha multa de 734.495 euros por un delito de branqueo de capitais no marco do xuízo por unha das pezas da coñecida como 'Operación Carioca' en Lugo.

Foron as "dilacións indebidas" da causa pola que se rebaixa o castigo a esta parella, dado que a Fiscalía pedía inicialmente para ambos os dous anos e medio de prisión e un millón e medio de euros de multa.

O home condenado é o ex dono de varios clubs de alterne, entre outros o EROS que se investigou no marco da 'Operación Carioca' que levaba a entón xuíza do Xulgado de Instrución Número 1 de Lugo, Pilar de Lara, que foi sancionada polo Consello Xeral do Poder Xudicial e que tivo que abandonar a súa praza e trasladarse a Ponferrada.

Este xuízo formaba parte dunha das pezas separadas da 'Carioca', investigación sobre redes de prostitución en Lugo. Segundo relata a Fiscalía, os dous acusados utilizaban contratos de compravenda de diferentes locais, leiras e bens para encubrir desvíos de diñeiro cara a diferentes contas, varias delas propiedade da familia da muller, localizadas en Colombia país de orixe da acusada.

As operacións que foron xulgadas estendéronse durante case cinco anos, entre 2005 e 2009. Ambos os condenados agora chegaron a posuír distintos negocios en Lugo, Ourense e tamén en Asturias.

DESDE 2008

O avogado da parella, Pepe López Riopedre, puntualizou tras concluír a vista que "o acordo se fundamenta, totalmente, nas dilacións indebidas moi cualificadas". "Estamos a falar dun procedemento que se instrúe no 2008 e estamos en abril de 2021", abundou.

"Optamos por tirar de pragmatismo puro e duro, asumir uns feitos controvertidos. Hai feitos en que estabamos completamente seguros da inocencia do meu defendidos pero isto podería supoñer quizá chegar ao Supremo e estar sete ou oito anos máis con este vía crucis para eles", subliñou.

O avogado criticou as "instrucións" que levou a xuíza Pilar de Lara e lembrou que "hai unha sanción, practicamente firme a esta xuíza instrutora por levar macrocausas a torto e a dereito e imputando a centenares de cidadáns, un pouco á ligera".

López Riopedre recoñeceu que o acordo é "froito do mal proceder na instrución". "Durante todos estes anos non foi un camiño de rosas porque os meus defendidos estiveron asinando, sometidos a unha serie de medidas cautelares moi gravosas, estiveron practicamente desterrados durante varios anos e tiveron que abandonar a comunidade de Galicia", indicou en relación a algúns dos "agravios" desta investigación.

"BENEFICIÁMONOS"

"Un pouco beneficiámonos a longo prazo de poder sacar adiante a atenuante de dilacións indebidas moi cualificada e isto sucedeunos a nós e sucederá en todas as macrocausas, porque falamos de vistas que teñen lugar ao cabo de doce, trece, catorce anos que nin os atentados de Atocha tardaron tantos anos en xulgar, nin sequera o Prestige", sostivo.

"É algo demencial", resolveu o avogado, que confirmou finalmente que os seus clientes no momento dos feitos eran "parella, pero pasaron tantos anos e agora cada un ten a súa vida por separado e refixeron as súas vidas". "Non teñen relación a día de hoxe", concluíu Pepe López Riopedre