A fábrica de Vigo, en ERTE durante dous meses, produce un dos coches máis vendidos en Europa

O éxito do novo modelo está ensombrecido polos problemas de subministración de microchips, que fará baixar a produción en Balaídos

O Peugeot 2008 e o modelo Corsa da firma automobilística Opel volveron situarse no mes de febreiro entre os dez coches máis vendidos en Europa; lista que nesta ocasión estivo encabezada polo Peugeot 208, do cal se venderon 18.375 unidades no 'Vello Continente', un 12% menos.

Segundo datos de Jato Dynamics recollidos por Europa Press, o Peugeot 2008, que se produce en Vigo, aumentou as súas matriculacións un 51%, ata as 17.120 unidades, posicionándose en segunda praza do mercado europeo, por diante doutros automóbiles como o Volkswagen Golf (16.185 unidades, -34%), o Toyota Yaris (15.467 unidades, +7%), o Fiat Panda (15.400 unidades, -13%), o Renault Clio (15.349 unidades, -38%) ou o Citroën C3 (15.281 unidades, -6%).

O oitavo na lista dos máis vendidos en Europa é outro 'español', o Opel Corsa, que se fabrica en Zaragoza, do cal se entregaron 14.615 unidades o mes pasado, un 21% menos. Pechan o 'top 10' europeo o Skoda Octavia (14.554 unidades, -2%) e o Volkswagen T-Roc (13.829 unidades, dato similar ao de 2020).

COCHES DE MOTOR HÍBRIDO 
En canto á lista dos híbridos enchufables máis vendidos en Europa, o Renault Captur, ensamblado en Valladolid, situouse como o terceiro modelo deste tipo máis matriculado en febreiro no continente, con 2.522 unidades, mentres que o Ford Kuga, construído en Valencia, foi o oitavo híbrido enchufable máis 'popular', con 2.026 unidades (+486%).

O único 'español' 100% eléctrico que logrou entrar na clasificación dos dez coches 'cero emisións' máis vendidos en Europa foi de novo o Peugeot 2008, con 1.992 unidades.

En febreiro, ata un 14% dos turismos vendidos en Europa tiña unha mecánica eléctrica ou híbrida enchufable. Por marcas, Tesla volveu situarse como a firma máis electrificada, xa que o 100% dos seus coches é eléctrico. Geely colocouse en segunda posición, cun 45% dos seus modelos vendidos en febreiro en Europa con motorizacións enchufables, seguida de Jaguar Land Rover (31%), de Daimler (27%), de grupo BMW (24%) e de Hyundai (16%), que se sitúan por encima da media europea.