Trata de saltarse un control en Cambados e acaba estampado contra unha casa: cuadriplicaba a taxa permitida

Tras o impacto, o condutor, un mozo de 19 anos, foi sometido a unha proba de alcoholemia, onde cuadriplicou a taxa permitida.

Ademais dos danos materiais, hai que lamentar un dos residentes na vivenda resultou ferido de gravidade no suceso. 

A Garda Civil interceptou a un condutor novel de 19 anos que tivo un accidente tras tratar de eludir un control establecido por unha patrulla do Destacamento de Tráfico da Garda Civil de Pontevedra con motivo da verificación as medidas establecidas para a xestión da crise sanitaria ocasionada pola Covid-19.

Segundo relatou o Instituto Armado, os feitos sucederon ás 17,35 horas do pasado sábado no quilómetro 0,4 da PO-302, na localidade de Cambados, cando os axentes apreciaron como un turismo que se dirixía á zona do control pretendía "evadilo cambiando bruscamente a súa dirección".

Coa manobra de evasión chegou a perder o control do vehículo e saíuse da vía e chocou co muro dunha vivenda, resaltaron as mesmas fontes.

O turismo conducíao un mozo veciño de Vilanova de Arousa que, xunto co seu acompañante, resultaron ilesos. Mentres, alén do muro de atopaba un habitante da vivenda que resultou ferido de gravidade nunha perna e tivo que ser trasladado de urxencia ao Hospital Montecelo de Pontevedra.

Así mesmo, ao realizar a proba de alcoholemia púidose comprobar que o condutor obtivo senllos resultados positivos de 0,66 e 0,65 mg/l en aire inspirado, que "cuadriplican o exceso do máximo permitido de 0,15 mg/l para condutores noveis", subliña a Benemérita.

DELITO

Ao condutor do turismo atribúeselle un delito contra a seguridade viaria e outro de lesións por imprudencia. Por iso, indican as mesmas fontes pode enfrontarse a pena de prisión de tres a seis meses ou a multa de seis a doce meses ou coa de traballos en beneficio da comunidade de 31 a 90 días, e, en calquera caso, coa privación do dereito para conducir vehículos de motor ou ciclomotores por tempo superior a un e ata catro anos.

Debido a estes feitos instruíronse dilixencias que serán entregadas no xulgado de Instrución de garda de Cambados.