Unha denuncia de case 1.000 km: Policía de Lugo sanciona a un viandante tras recibir unha chamada desde Alacante

924 km separan a Lugo de Alacante, pero nin esa distancia evitou que un viandante fose "delatado" ante a Policía Local de Lugo por camiñar sen máscara e fumando.

O detonante da denuncia, que chegou á cidade amurallada desde a beira do Mediterráneo, foi un vídeo que emitiu o infractor en redes sociais, onde se lle vía incumprindo as normativas. 

Policía Local | Foto: EP

A Policía Local de Lugo tramitou proposta de sanción contra unha cidadán que foi localizado camiñando pola rúa, sen máscara e fumando, tras recibir un aviso dunha persoa que vive en Alacante, e que vira ao suposto infractor nun vídeo en directo en redes sociais.

Segundo informaron fontes municipais, os feitos ocorreron na mañá do pasado xoves, cando o 092 recibiu un aviso dunha persoa residente en Alacante, e que alertaba de que estaba a ver un vídeo en directo a través de redes sociais, no que un viandante camiñaba por unha rúa de Lugo, sen usar a máscara e fumando.

Unha patrulla da Unidade Territorial de Policía de Barrio localizou a este home na Avenida de Ramón Ferreiro, precisamente cando estaba a acabar o vídeo en directo. Tras ser identificado foi proposto para sanción por non usar máscara e por fumar sen garantir a distancia interpersoal.

Ademais, durante a pasada fin de semana, a Policía Local de Lugo tramitou outra trintena de denuncias por infraccions da normativa sanitaria antiCOVID, entre elas, a varias persoas que participaron en festas particulares de madrugada, sen usar máscara e sen respectar as restricións sobre reunións de non conviventes e sobre o 'toque de queda'.