Banco Sabadell planea outra rolda de miles de despedimentos cando aínda non completou as saídas voluntarias

O banco catalán, que no seu día absorbeu ao Banco Gallego, era o favorito para entrar na onda de fusións no sector financeiro. Con todo, vai continuar en solitario, polo de agora, pero con menos oficinas e persoal.

Banco Sabadell culminará esta semana o seu plan de axuste voluntario coa saída doutros 1.000 empregados da entidade, en liña co previsto. Pero comezou a considerar xa novos recortes de persoal, que se decidirán nos próximos meses.

Oficina do Sabadell / EP

Das conversacións entre o banco e os sindicatos, despréndese que a entidade prepara recortes de persoal adicionais, de ata 2.000 persoas en España ao longo de 2021, ademais dos 1.800 xa anunciados e a piques de executarse na súa totalidade a finais deste mes de marzo.

A finais de febreiro materializáronse ao redor de 700 saídas, que se engadiron ás 14 xubilacións anticipadas do pasado mes de decembro e ás preto de 70 desvinculacións que se produciron durante xaneiro.  Para garantir a continuidade de determinados negocios, quedará dentro da entidade un número residual de traballadores incluídos no plan que non sairán ata abril.