A dirección de DomusVi persegue ás traballadoras que denunciaron falta de medios, alerta a CIG

Algunhas operarias alertaron en febreiro que traballaban con medios insuficientes, queixa que negaron outras compañeiras

Este centro sufriu por esas datas un brote con máis dunha ducia de infectados entre os anciáns

Traballadoras da residencia DomusVi Laraxe na protesta nunha foto de CIG 

Unhas trinta persoas, entre delegados, traballadores e representantes sindicais, concentráronse na mañá deste venres, 26 de marzo, ante a entrada da residencia de maiores DomusVi Laraxe, situada en Cabanas (A Coruña), para denunciar "a persecución que están a sufrir por parte da dirección as integrantes do comité de empresa" e "os traballadores que os apoiaron tras denunciar no seu día a falta de equipos de protección individual (EPI).

Así llo trasladou a Europa Press Beatriz Fernández González, responsable do sector de residencias privadas de CIG Ferrol, sindicato convocante desta acción de protesta.

"Por mor desa denuncia, as delegadas do comité e os traballadores que as apoian están a sufrir un acoso silencioso", dixo a representante, que acusou á dirección de ningunealas" e de promover reunións "infrutuosas". "Coma se te sentases ante unha parede, sen ningún tipo de respostas", critican.

PREVENCIÓN DE RISCOS LABORAIS
Durante a concentración, Beatriz Fernández detallou que "houbo dous intentos de reunión para abordar a situación de prevención de riscos laborais", aínda que nelas "impediuse a presenza da asesora da CIG, co cal a delegada destes temas, que é recentemente chegada, tras constituírse este comité hai un ano, non se atrevía a ir soa".

É por iso que desde a parte social instouse á dirección a que "facilitase unha plataforma para poder participar desde o sindicato". "Vemos correcto que non se permita o acceso de ninguén externo ao centro, por motivos de seguridade, pero a resposta da dirección foi que non dispón de plataforma nin sabe crear ningunha e non ten ningún método para poder reunirse", engaden.

A CIG xa adiantou que están dispostos a realizar "as concentracións que sexan necesarias ata lograr que senten en serio e con ganas de solucionar a situación, de dar unha serie de explicacións e de asumir a súa responsabilidade".