Alivio mínimo de restricións en Galicia: o comercio recupera horarios pero non a hostalería

O presidente da Xunta acaba de anunciar que Galicia segue con restricións máximas. Os levantamentos son por agora mínimos, á espera da seguinte reunión da próxima semana.

A única novidade realmente relevante é que a partir do mércores o comercio volve aos seus horarios habituais. Iso si, o aforo máximo segue sendo do 50 por cento. Mantéñense pechados os centros comerciais as fins de semana.

Ata o de agora, só os comercios de produtos básicos (supermercados, farmacias, etc.) podían manter o seu horario habitual. O resto estaba limitado ata as 18 horas, pero xa non.

Feijóo na rolda de prensa anunciando o primeiro alivio das restricións nesta terceira onda 

Outra novidade é que o 22 de febreiro volverán as clases presenciais nos ensinos especiais, como as Escolas Oficiais de Idiomas ou nos conservatorios. Nas universidades as clases presenciais volverán o 1 de marzo. Antes de que os universitarios volvan ás facultades, a Xunta planea un cribado masivo entre os estudantes.

Nalgunhas residencias, as que completasen a vacinación fai 10 ou máis días, amplíanse as visitas, ata o de agora limitadas a un familiar.

Para a próxima reunión, Alberto Nuñez Feijóo adiantou que se valoraría levantar outras medidas, como a vixente prohibición de reunións de non conviventes. O mandatario argumentou que o nivel de ocupación nas unidades de coidados intensivos non permite máis marxe de alivio ata o de agora. "Os resultados son esperanzadores pero aínda non suficientes",  concluíu.

Mantense o illamento perimetral por municipios, aínda que Feijóo indicou que algunhas zonas poderíase aliviar despois das próxima reunón do comité de expertos do SERGAS, que será o vindeiro luns, en función de como sexan os datos desta semana.

Continúa tamén o polémico peche total da hostalería en todos os concellos. 

Sobre a vacinación, Feijóo dixo que "parece" que a vacina de Jansen autorizarase en marzo. O presidente dixo que mantén "a primeira semana de maio" como límite para que se vacinen todos os maiores de 80.