Boas noticias: a mellor cifra de positivos desde Reises e a mellor de positividade desde Noiteboa

As últimas cifras do coronavirus en Galicia son excelentes. Certo é que proveñen do sábado, xornada de menos test, pero aínda así o SERGAS completou máis de 11.000 PCRs e detectou menos de 500 positivos. Algo que non pasaba desde o 5 de xaneiro, en vésperas de Reises, cando a Xunta relaxou demasiado o número de probas.

Hoxe Galicia logra que a taxa de positividade baixe do 5%, o límite que a OMS indica para estimar que un brote pode estar en vías de ser controlado. A última vez que o conseguiu foi en Noiteboa.

O máis negativo segue sendo a cifra de mortos. Onte comunicouse o falecemento de 16 persoas, completando a peor semana da pandemia, con 152 decesos.

A incidencia acumulada a 7 días baixa de 229 a 215 positivos por 100.000 galegos. Aínda máis cae a de 14 días, de 546 a 518.

Aínda que Galicia aínda está lonxe de saír de risco extremo, para o que tería que baixar a 125 e 250 respectivamente, a caída destes dous indicadores confirma unha melloría cada vez máis robusta.

O descenso na incidencia acumulada non é cousa de hoxe. A media semanal leva á baixa desde o 26 de xaneiro e está no 6,8%, que é a mellor cifra de todo 2021.

EVOLUCIÓN DO CAMBIO DE CASOS ACTIVOS

Grazas a unha caída de 720 infectados, Galicia baixa a 19.246 casos activos. É un 3.6% menos que o día anterior.

A media semanal, que é o indicador máis relevante, prosegue o seu descenso e sitúase en -2,1%. Fai catro días que o SERGAS pode dicir que, atendendo á media semanal, cada día atende a menos novos enfermos que altas dá. A caída da presión hospitalaria parece pois consolidada, aínda que aínda non nas unidades de críticos.

CONCLUSIÓNS

Con todas estas series á nosa disposición, podemos inferir que:

• A pandemia segue freando en Galicia e non hai ningún indicio por agora dun rebote.
• A melloría cada vez é máis patente nas plantas convencionais, aínda que  onte o cómputo aumentase en 37. A semana empezou con 1.186 encamados non críticos e acábaa con 1.063.
• Desgraciadamente, esa rebaixa de 123 en camas convencionais aínda non se trasladou de forma notable ás UCIs, nin sequera teniendo en cuenta que está a morrer máis persoas que nunca.
• Unha vez que a presión sobre as UCIs empezo a baixar de forma notable, Galicia poderá dicir que deixou atrás o peor desta onda . Salvo, está claro, que haxa algún factor novo, como un brusco levantamento das restricións que sexa incapaz de conter a maior transmisibilidade da cepa británica, que a Xunta estima será a dominante pronto.

ÚLTIMOS DATOS POR ÁREAS

O optimista panorama déixase ver nas cifras das diferentes zonas. Todas as áreas sanitarias perden casos activos e en todas cae o número de novos positivos. Só A Coruña (166) supera os 100 novos diagnósticos, algo inédito este ano.

Con todo, a presión nas UCIs segue sendo elevadísima. Por poñer un exemplo, na Coruña hai 85 enfermos críticos, cando a CIG estima que como máximo hai 74 prazas. Eses 85 pacientes críticos non supoñen ningunha rebaixa respecto ao máximo da semana pasada, 86.  

A nivel de municipios, unha excelente noticia, non hai ningún en toda Galicia cuxo cómputo a 14 días haxa aumentando en máis de dez respecto ao cómputo de onte. Análise máis en detalle das cifras municipais e a nivel de área sanitaria nuns minutos en Galiciapress.