Investigal pide “dimisións” na Consellería de Educación polas súas "críticas falsas" contra o colectivo

Investigadores e investigadoras de Galicia denuncian as afirmacións “falsas, imprecisas e que manifestan un descoñecemento total do programa de axudas” por parte da Xunta.

A organización sinala que esta “xestión nefasta” do Goberno de Galicia tradúcese nun malgaste de 7 millóns de euros ao ano.

Desde a Rede Galega pola Investigación destacan a súa “sorpresa” polos “argumentos, emitidos desde a Consellería de Cultura, Educación e Universidade sobre a nova convocatoria de axudas á investigación  pre e  posdoctoral”. Segundo a Xunta, as críticas do colectivo son infundadas despois de que Investigal fixese pública a súa desconformidade coas modificacións realizadas respecto diso. Nesa liña, desde a organización sinalan que a Subdirección Xeral de Promoción Científica e Tecnolóxica Universitaria aínda non respondeu á súa solicitude para unha reunión entre as partes.

“Os argumentos utilizados onte pola Consellería de Educación afástanse da realidade e son falsos ou imprecisos e manifestan un descoñecemento total do programa, polo que InvestiGal solicita a dimisión inmediata da persoa que os emitiu e unha xustificación pública dos mesmos”, reclaman.

Nesa liña, os investigadores galegos subliñan que a convocatoria de 2020 “queda suprimida” -algo que a Xunta nega-, fronte a convocatorias doutras autonomías ou organismos europeos que mesmo aumentaron o seu financiamento, e que para este 2021 os contratos “se precarizan máis” e ademais “recortan as horas de docencia”.

“FALTA DE COMPROMISO”, SALARIOS PEORES…

Por isto, denuncian a “falta de compromiso da Xunta” coa investigación e as súas mentiras ao afirmar que a convocatoria para este ano é “a maior da historia de Galicia no número de contratos”, algo falso segundo o colectivo, xa que empata co ano 2016, cando a comunidade viña de “outro ano en branco e sen axudas”, algo que prexudico a moitos profesionais que polas datas non puideron acceder a esas axudas. “Un bo negocio para a Xunta que cun mesmo orzamento cobre dous anos cun aumento irrisorio no número de axudas e nefasto para os e as investigadoras que ven como unha convocatoria anual convértese de maneira cíclica en bianual por obra e arte da Subdirección Xeral de Promoción Científica e Tecnolóxica Universitaria”.

“Centos de investigadores e investigadoras víronse gravemente prexudicados directamente pola Xunta ao non convocar ningunha axuda posdoctoral ao longo do 2020, o que fomentou indubidablemente á precariedade e á fuga de cerebros”, lamentan desde Investigal.

A continuación, desde Investigal sinalan os salarios máis baixos dos investigadores con respecto a anos anteriores, que mesmo os sitúa en “mínimos salariais fixados por algunhas institucións como a USC ou o CSIC”, ou os cambios no número de horas de docencia a diferenza doutras convocatorias.

“Desde InvestiGal consideramos que baixo estas condicións o programa de axudas posdoctorales está abocado ao fracaso, e que lonxe de coidar e incentivar o crecemento dun sector estratéxico para o futuro do país, constitúen unha nova ofensa por parte da Xunta de Galicia cara ao seu desmantelamento gradual”, inciden, á vez que advirten o malgaste que supón: “7 millóns de euros de diñeiro público ao lixo cada ano por unha xestión nefasta”.