Rebelión polo Clima protestan en varias cidades galegas contra a "neglixencia" climática

Compostela, Vigo, Pontevedra e Vilagarcían acolleron protestas polos incumprimentos dos acordos de París.

Repsol, BBVA ou o Banco Santander foron algúns dos brancos da protesta.

As organizacións integradas en Rebelión polo Clima protagonizaron mobilizacións en 27 provincias do Estado para denunciar a "neglixencia climática" de Gobernos e empresas, cando se cumpren cinco anos da adopción do acordo de París.

En Galicia, varias decenas de activistas impulsaron protestas e actos en Santiago, Vigo, Pontevedra ou Vilagarcía, en grupos pequenos e respectando as medidas de distanciamento e de seguridade polo contexto de pandemia.

Estas organizacións fixeron percorridos por sedes e puntos de comercialización de diversas empresas nas cidades galegas, para denunciar a responsabilidade destas compañías ante a crise climática, portando pancartas nas que se lían lemas como 'Esta empresa escaralla ou planeta' ou 'Esta institución non paga as súas facturas co clima'.

Os activistas protagonizaron 'performances' e accións nas que simulaban derramar petróleo neses puntos e denunciaban o 'greenwashing' adoptado por algunhas empresas como "cortinas publicitarias" para esconder a súa "incapacidade de lograr un modelo sostible".

Entre elas criticaron a compañías como Repsol, Coren, BBVA, CampoFrío ou Banco Santander, mentres que tamén reprocharon á Xunta de Galicia a "escasa ambición" da 'Estratexia Galega de Cambio Climático', ademais de denunciar o "escurantismo e falsas solucións" sobre os fondos de recuperación post-covid.