Covid por concellos: a enfermidade baixa o ritmo en Boiro, esborrállase en Vilaba e sobe en Santiago, Ourense e Vilagarcía

A análise xeográfica dos últimos datos do SERGAS ofrece un descenso considerable no conxunto de Galicia esta xornada, pero coa mirada aínda en Boiro, que mantén a súa escalada e segue sendo un dos concellos que máis preocupa ás autoridades galegas, aínda que nos últimos días o ritmo de contagios parece descender sensiblemente.

O municipio barbancés aínda lanza novos casos a diario, pero pasou dos 24 casos do mércores aos nove de hoxe. Segue sendo a localidade que máis crece, aínda que hoxe tamén hai subidas notorias, aínda que non alarmantes, en Santiago de Compostela, Ourense e Vilagarcía de Arousa.

A capital de Galicia, a cidade herculina, a cidade amurallada e a cidade termal contan con unha incidencia acumulada en 14 días de entre 50 e  150 casos por 100.000 habitantes (rosa escuro), mentres que a a cidade departamental, a cidade do Lérez e a cidade olívica aínda contan cunha incidencia de entre 150 e 250 casos por 100.000 habitantes (laranxa). As sete cidades abandonaron o nivel vermello de alerta. 

Nas cidades Vigo volve ser a que lidera o decenso de casos, cun descenso de 17 menos desde onte. Ferrol con sete menos e Lugo e A Coruña con catro menos cada unha tamén baixan. Con todo, mentres que Pontevedra suma un caso máis, Ourense e Santiago de Compostela crecen con sete máis con respecto ás cifras de onte.

Se nos detemos concello a concello apreciamos poucas variacións significativas, máis aló da xa citada Boiro. Si destaca tamén Vilagarcía, cunha evolución errática: hoxe suma sete casos máis o municipio arousán. No apartado de grandes noticias destaca Vilalba, con 26 casos menos, a caída máis pronunciada da xornada. Carballo, con 18 menos, e Narón, con sete menos, tamén melloran as súas cifras a pesar da súa delicada situación.

ÁREAS EN ASCENSO

Con estes datos, e aínda que no conxunto de Galicia hai unha importante caída no número de casos activos, hoxe hai varias áreas que experimentan un aumento nos seus casos activos. Hoxe Santiago de Compostela volve liderar o ascenso, con 28 casos activos máis. A área da capital leva tres xornadas sen ofrecer un descenso nos seus casos, e debuxa a peor situación nestes momentos: 72 novos positivos en 24 horas cunha positividade do 6,4%, a máis alta de Galicia.

Á compostelá séguenlle as áreas de Ourense e Pontevedra, cunha vintena e unha ducia de novos casos. Estas dúas ademais comparten unha positividade similar, moi próxima ao 5%, aínda que é no apartado de novos positivos onde gaña a pontevedresa con 58 por 30 da ourensá.

ÁREAS EN DESCENSO

Estas subidas ven compensadas, sobre todo, polos descensos que hoxe lanzan tanto A Coruña -76 casos menos desde onte- como Vigo -86 casos activos menos-. A área herculina computou onte 43 novos contagios, mentres que as PCR da área olívica rexistraron 52 novos casos. A positividade na coruñesa é do 2,5%, mentres que na viguesa cae ao 1,3%.

Lugo e Ferrol tamén rebaixan as súas cifras, con 26 casos menos tanto nunha como noutra. Con todo, mentres a lucense anotou 18 novos positivos cunha positividade próxima ao 2%, na área ferrolá a positvidad subiu ata o 5% tras contar 28 novos casos.

Segundo os datos das notas de prensa do SERGAS, este sábado 5 de decembro o número de casos activos de coronavirus en Galicia é de 5.530 , dos cales 1.017 son da área da Coruña, 545 de Lugo, 403 de Ourense, 851 de Pontevedra, 1.315 da área de Vigo, 852 de Santiago e 547 de Ferrol.