Preto dunha trintena de deportistas galegos participan na campaña contra a violencia de xénero

A medallista olímpica Teresa Portela, a campioa mundial Ana Peleteiro ou o prometedor Adrián Ben forman parte desta campaña da Xunta de Galicia.

O presidente da Xunta, Alberto Núñez Feijóo destacou a implicación dos 29 deportistas galegos que participan na campaña institucional contra as violencias machistas "levando, ademais da bandeira de Galicia polo mundo, a do 'non' á desigualdade e á violencia de xénero".

O presidente do Goberno galego, Alberto Núñez, acompañado polo secretario xeral para ou Deporte, Jose Ramón Lete Lasa; e a conselleira de Emprego e Igualdade, María Jesús Lorenzana; mantivo este luns no pavillón do Centro Galego de Tecnificación Deportiva de Pontevedra un encontro telemático no que ha trasladou o agradecemento a todos estes deportistas.

Durante unha videoconferencia, Feijóo reiterou o "firme compromiso" do Goberno galego na loita contra "este disparate machista e enfermidade social chamada violencia machista". Un compromiso, que segundo sinalou, ten reflexo no desenvolvemento do Pacto de Estado nesta materia.

Entre outras medidas, o presidente da Xunta destacou o apoio integral aos menores que quedan orfos; a cobertura económica e social ás vítimas gravemente feridas; ou as quendas de garda psicolóxica e social.

MEDIDAS NO ÁMBITO DO DEPORTE

No campo do deporte, lembrou que o novo decreto do Deporte galego de alto nivel inclúe, por exemplo, medidas que facilitan compatibilizar o deporte coa maternidade. "E acordamos no Parlamento deixar de patrocinar os eventos deportivos nos que os premios polos mesmos postos e categorías teñan diferenza de contía entre a competición masculina e feminina", engadiu.

Para Núñez Feijóo o deporte "ademais de ser unha escola de tolerancia e de convivencia" supón unha "ferramenta no camiño cara á igualdade entre homes e mulleres e na loita contra a violencia de xénero", debido á súa "capacidade para unir e para facer pobo e país".

Feijóo concluíu referíndose ás traxectorias dalgúns dos deportistas que participan na campaña, como a piragüista Teresa Portela, a atleta Adiaratou Iglesias e o judoca Nikoloz Sherazadishvili. No acto tamén estiveron presentes outros deportistas de renome, como Ana Peleteiro, Adrián Ben, Tamara Echegoyen ou Bea Gómez entre outros.

O presidente galego, ademais de poñer en valor os avances en materia de igualdade no ámbito deportivo, admitiu que "aínda queda moito por facer".