Pouco máis dun mes para a paralización da planta de Siemens Gamesa das Somozas, denuncian sindicatos

Os traballadores secundarán todos os venres mobilizacións para demandar á multinacional que aposte por este centro.

Este venres xa se celebrou unha mobilización de dúas horas para instar á dirección da empresa a que manteña os postos de emprego da planta. 

Delegados e traballadores da empresa Siemens Gamesa nas Somozas (A Coruña) concentráronse no mediodía deste venres durante dúas horas, entre as 13,00 e as 15,00, para demandar da dirección da multinacional que se aposte pola continuidade deste centro produtivo.

A protesta, que se desenvolveu ante a factoría situada no polígono industrial, buscou alertar sobre a posible deslocalización desta compañía dedicada á fabricación de pas para aeroxerador, cuxa carga de traballo finaliza o próximo 20 de decembro.

E é que nesta data está previsto consumar o actual encargo das pas do modelo SG-114, de 57 metros de longo, que teñen contratadas e que son ademais as únicas que producen nas instalacións das Somozas.

Desde o comité de empresa, o seu presidente, Sergio López (UXT), valorou como "positiva" a acción de protesta deste venres: "Vimos como o persoal aos poucos vaise concienciando da necesidade destas medidas de protesta. Mesmo impedimos a saída dunha pa do recinto da fábrica".

A 34 DÍAS DA PARALIZACIÓN

O sindicalista tamén apuntou que, tras manter "unha reunión coa xerencia da empresa esta semana", esta díxolles "que a día de hoxe todo segue igual". "Xa só estamos a 34 días da data que nos deron de paralización da planta", apuntou López.

Deste xeito, o comité de empresa reclama á multinacional que aposte por este centro de traballo coa instalación de novos moldes e que permitan a fabricación de modelos de aspa de maior tamaño, que son os que se están instalado de maneira maioritaria nos novos parques, tanto terrestres como mariños.

Non en balde, López tamén avanzou que teñen previsto "facer proximamente medidas de protesta máis contundentes".