A escalada de casos devolve ao Barco á alerta vermella; Nigrán e Poio baixan ao nivel 2 en só 24 horas

O municipio ourensán do Barco de Valdeorras volve engordar a lista de municipios en nivel de alerta 3, unha lista na que tamén están as localidades de Ourense, Santiago, Arteixo, A Laracha, Narón, Culleredo, Ordes, Ames, Vilagarcía, O Carballiño, Barbadás, Verín e Cangas.

Nigrán e Poio, que onte pasaron ao nivel vermello de alerta, regresan hoxe ao nivel 2, un estado de alerta no que tamén están as grandes urbes de Vigo, A Coruña, Pontevedra, Lugo e Ferrol, entre outros municipios. 

Mapa de alertas por municipios en función de novos casos confirmados por PCR en 7 días

O número de municipios galegos no nivel máximo de alerta, o 3, pola incidencia do coronavirus na última semana descende a 14, ao volver activarse este martes no Barco de Valdeorras (Ourense) e ao saír os pontevedreses Poio e Nigrán tan só un día despois de entrar en vermello.

Ademais, segundo consta no mapa 'semáforo' actualizado diariamente pola Consellería de Sanidade, continúan no nivel 3 pola pandemia os concellos de Ourense, Santiago, Arteixo, A Laracha, Narón, Culleredo, Ordes, Ames, Vilagarcía de Arousa, O Carballiño, Barbadás, Verín e Cangas do Morrazo.

A entrada no nivel máximo de risco de todas estas localidades implica que detectaron máis de 21 casos de coronavirus no últimos sete días, fóra de Ourense e Santiago. Estas dúas, ao ter máis de 50.000 habitantes, están en alerta vermella por sumar máis de 120 contagios, en caso da cidade das Burgas, e máis de 112 na capital galega.

NIVEL DE ALERTA 2

Mentres, en situación 2 --no nivel laranxa do mapa-- sitúanse 19 municipios, dous máis que o luns, dos que 15 repiten con respecto á última actualización de datos: Vigo, A Coruña, Pontevedra, Lugo, Ferrol, Fene, Oleiros, Carballo, Mesía, Teo, Vilanova de Arousa, Gondomar, O Porriño, Salvaterra de Miño e Boborás.

Mapa de alertas por municipios en función de novos casos confirmados por PCR en 14 días

Así, os cinco que se suman á alerta laranxa son os concellos A Estrada, Tui e Marín, por empeorar a incidencia a sete días; e Poio e Nigrán, que o fan despois de que este luns entrasen no nivel vermello.

Pola súa banda, abandonan a situación 2 Pereiro de Aguiar --agora está en nivel 1, en amarelo-- e O Barco de Valdeorras --acaba de subir ao nivel 3--.

En cor laranxa inclúense municipios de máis de 50.000 habitantes con 56 e 111 casos novos de COVID-19 á semana por 100.000 habitantes e nos de menor poboación que presenten entre 14 e 20 casos.