Jácome destaca a caída nos casos activos en Ourense "tras moitos días" á alza, pero seguen por encima dos 500

O alcalde de Ourense, Gonzalo Pérez Jácome, celebrou este sábado a baixada dos casos activos de COVID-19 na cidade, principal foco da pandemia en Galicia. En concreto, a Consellería de Sanidade informoulle de que este sábado hai 532 persoas coa enfermidade, é dicir, que baixaron en cinco "tras moitos días seguidos á alza".

A través da súa conta de Twitter, Jácome destacou que "se mañá" ou "pasado" segue en descenso, a terceira urbe de Galicia "podería pasar o pico e estar xa na fase de aplanar a curva".

A cidade de Ourense e o municipio limítrofe de Barbadás atópanse confinadas perimetralmente desde a medianoite do xoves, sen que ninguén poida saír ou entrar sen causa xustificada, debido ao significativo aumento de casos de coronavirus.

A pesar da baixada dos casos activos na capital provincial, supoñen o 36,1 por cento de todo a área sanitaria de Ourense-Verín-O Barco de Valdeorras, que suma 1.474 pacientes de COVID. Ademais, os contagios detectados na provincia continúan disparados, con 191 novos nas últimas 24 horas, segundo datos de Sanidade.

Esta cifra é a segunda máis alta de positivos diarios detecados desde o comezo da pandemia, tan só por detrás deste venres, e supón case a metade das novas infeccións de toda Galicia. Ademais, a porcentaxe de positividade nas probas PCR realizadas segue subindo e este sábado colocouse no 22,5%.

En canto á hospitalización, a área sanitaria de Ourense acumula 65 ingresados. Na capital hai 55, dos que 54 están no Complexo Hospitalario Universitario (CHUO) --nove en UCI-- e outro na unidade de críticos do centro médico O Carmen. Pola súa banda, os hospitais comarcais de Verín e Valdeorras contan con oito e dous ingresados en planta, respectivamente.