Alcoa advirte que "non é realista pensar" que poida vender antes de que acabe o prazo do domingo

O presidente de Alcoa España, Álvaro Dourado Baselga, sinala que "non é realista pensar que se poida asinar un acordo de venda" a Liberty House da planta de San Cibrao, en Cervo (Lugo), antes do 27 de setembro, conforme ao acordado cos representantes dos traballadores.

A CULPA, DO OUTRO
Isto é así, segundo destaca a través dun comunicado de prensa, "dadas as demoras e as demandas non razoables de GFG (grupo propietario de Liberty)".

Na nota, Alcoa incide en que "transcorridas case dúas semanas sen que GFG respondese", o grupo enviou o venres unha proposta de termos e condicións (termsheet) que, a xuízo da multinacional estadounidense, "non mostra ningún movemento para avanzar no proceso de venda da planta de aluminio primario".

"Segundo a súa última proposta de termsheet, parece que GFG non está interesada en adquirir a planta de aluminio, a menos que tamén poida obter o control da refinería de alúmina, asegurarse a subministración de alúmina en termos pouco realistas e evitar comprometer os seus propiosfondos para o futuro da planta de aluminio", sinala Dourado Baselga.

Alcoa defende negociar "de boa fe durante todo o proceso" e realizar "varias concesións para chegar a un acordo conforme ao calendario proposto por GFG".

DISPOSTA A VENDER POR 1 EURO
Entre elas, menciona o traspaso da planta de aluminio por 1 euro, a contribución con 50 millóns de euros a un fondo destinado a apoiar o futuro da planta, o pago de "todos os custos necesarios" para separar a planta de aluminio da refinería, e un contrato de subministración de alúmina por cinco anos en condicións estándar de mercado.

"Pola contra, GFG demandou condicións fóra dos límites do acordo asinado co comité de empresa", critica. E engade que o seu 'termsheet' mantén a petición dun contrato de alúmina de 20 anos"fóra das prácticas habituais do mercado", dereitos sobre unha venda futura da refinería e que "non está disposta a comprometer ningún financiamento para o futuro da planta".

A planta de aluminio de San Cibrao, segundo Alcoa, atópase nunha situación "insostible", debido "en gran parte á falta dun marco enerxético competitivo en España que persiste desde hai anos", segundo advirte.

Así, incide en que a planta de aluminio incorreu en perdas de máis de 110 millóns de euros nos últimos dous anos e actualmente calcula as perdas en "aproximadamente 1 millón de euros á semana".

COMITÉ
Pola súa banda, o comité de empresa, que este martes protagonizou un novo corte de circulación, nesta ocasión na autovía A6 ao seu paso por Outeiro de Rei, lamentou que Alcoa "segue inamovible" e volveu a acusar á empresa de "mala fe".

Neste caso, avanza que solicitará tanto ao Goberno central como ao autonómico "que continúen insistindo na mediación do proceso de venda".