Jácome xa non está só: o novo edil de DO xura "absoluta lealdade ao alcalde" e os demais danlle a "benvida ao circo"

A tormenta política na que parece instalada o Concello de Ourene e en particular o seu alcalde, Gonzalo Pérez Jácome, deixou ver un raio de sol para o líder de Democracia Ourensá co nomeamento do novo edil, Telmo Ucha.

O novo concelleiro auriense tomou posesión do cargo esta mañá e afirmou estar ao dispor de Jácome para sacar á cidade do impasse no que se atopa desde hai semanas, cando varios membros de DO se amotinaron contra a xestión do rexedor.

O edil de Democracia Ourensá (DO) que tomou posesión durante o pleno deste mércores --tras a dimisión de Mario González--, Telmo Ucha, afirmou que, "con absoluta lealdade ao alcalde", a Gonzalo Pérez Jácome (DO), poñerase "á súa disposición" para desbloquear a actual situación na cidade.

Así o trasladou na mañá deste mércores a través dunha nota de prensa, na que aclarou que tomou esta decisión, "profundamente meditada, sen entrar en debates sobre cuestións de partido".

De feito, a súa posición será a de formar parte das xuntas de goberno locais sen aínda confirmar se se sumará ademais á lista de DO ou pasará aos non adscritos --conta desde hoxe con cinco días hábiles para decidilo--.

Polo momento, como terceiro concelleiro nas xuntas, estas xa quedarían desbloqueadas, debido a que, ata o de agora, unicamente o propio Jácome e o seu exclusivo afín, o recentemente nomeado tenente de alcalde, Armando Follea, estaban en disposición de integralas, sendo necesario un mínimo de tres edís.

A postura de Ucha afasta, así, a posibilidade de unha moción de censura articulada entre a oposición e o seu apoio como non adscrito, clave para conformar unha maioría ao non integrar o goberno anteriormente durante esta lexislatura --o seu voto si tería valor, non así o dos concelleiros díscolos co rexedor--.

Subsiste por tanto unha soa opción para poder apartar a Jácome da Alcaldía: unha moción de censura orquestrada entre o PSOE --con 9 edís-- e o PP --con 7--, unha opción que o presidente do PP provincial, Manuel Baltar, afirmou que estaba "sobre a mesa" e que é "perfectamente viable". Os socialistas sempre supeditaron o asunto a unha determinación dos órganos do partido.

"A miña decisión está baseada unicamente no principio de respecto á cidadanía de Ourense", abundou o novo concelleiro, á vez que destacou que, "nesta situación, na que moitas persoas están a sufrir as consecuencias da COVID-19", os que teñen que "asumir responsabilidades políticas" deben "responderlle" aos veciños "con total dedicación e traballo".

Deste xeito, Ucha explicou que pasará a "asumir aquelas responsabilidades" para "servir da mellor maneira á cidadanía", a súa "única preocupación diaria dentro da política local", finalizou.

CIDADÁNS TENTOU CONVENCER A UCHA

Durante a sesión plenaria de hoxe, o portavoz de Cidadáns, José Araújo, tentou convencer a Ucha para que non apoiase o goberno de Jácome, a pesar das advertencias do rexedor e presidente do pleno para que se referise soamente á modificación orzamentaria que se estaba debatendo no momento: "Espero que Telmo recapacite estes días e vexa cal é a situación da cidade".

"Jácome decidiu montarse no submarino con Armando Follea e andan polo Atlántico con moi pouco osíxeno, vostede é importante para darlle ou non osíxeno a este esperpento", reiteroulle Araújo.

Na mesma liña mostrouse o portavoz do BNG, Luís Seara, a quen si lle quitou a palabra Jácome por referirse á reunión convocada a semana pasada e á que o PP non asistiu: "Jesús Vázquez --coordinador municipal dos populares-- agarrouse como un náufrago a unha táboa para xustificar a non asistencia".

O portavoz dos socialistas, Rafael Rodríguez Villarino, criticou a "situación absolutamente anormal e antinatural" que vive o concello, unha conxuntura que "se ten que corrixir".

Ana Morenza, pola súa banda, como exedil de Facenda e Contratación --ao debaterse unha variación nos orzamentos--, simplemente referiuse á crise actual apelando a Ucha: "Benvido ao circo".

DOUS PORTAVOCÍAS EN DO

O secretario do pleno aproveitou a xornada de hoxe para aclarar a situación con respecto á portavocía de DO, nun principio, en mans de Miguel Caride --líder dos críticos--, e que tras estalar as disputas internas pasou a Armando Follea por orde de Jácome, como presidente da formación.

Respecto diso, subliñou que "o concello non pode entrar a fiscalizar a actuación dos partidos" e que se atopa "á espera de recibir a certificación do Ministerio do Interior" que expoña quen é o "representante legal" de DO, "que é con quen o secretario do pleno comunicarase posteriormente para aclarar a situación".

Jácome, tras escoitalo, erixiuse precisamente como ese representante legal do partido: "Persoa coa que teño unha estreita relación", indicou.

Neste escenario, Democracia Ourensá continúa gobernando a cidade de Ourense con tan só tres edís e un total de 12 áreas para repartirse despois da ruptura do pacto de coalición do PP e o abandono das súas competencias, a dimisión de Mario González, a retirada das carteiras a outros dous concelleiros de DO e o rexeitamento doutros dous máis.

Este venres está convocado outro pleno, pero na Deputación, onde é DO quen sustenta o goberno do PP. Alí comprobarase que postura tomará o vicepresidente da institución, Armando Follea, na votación dos orzamentos.

Por agora, o presidente do organismo, Manuel Baltar, conta polo menos co 'si' do segundo representante, Miguel Caride, o necesario para aprobar os orzamentos provinciais. Se Follea non os apoia, Baltar xa anunciou que lle retirará as competencias.