Suspendida a folga dos socorristas da Coruña: acordo entre a empresa e os traballadores

O comité de empresa do servizo de Salvamento e Socorrismo dos areais da Coruña comunicou a suspensión da folga tras un acordo coa empresa.

En concreto, explica que o mércores asinaron, na sede da Inspección de Traballo, o acordo "unha vez que a empresa accedeu case á totalidade das nosas pretensións" tras convocar a folga, entre outras cuestións, para reclamar o pago das horas extra.

O comité de empresa agradece á veciñanza "o seu apoio e comprensión", un agradecemento que fai extensivo á Inspección de Traballo e ao Concello da Coruña, así como aos seus compañeiros.

Por "o esforzo e a loita que conseguiu que a empresa non se saíse coa súa precarizando o noso traballo e as nosas condicións".