Nin se detectou un brote nun bautizo nin eran 150 invitados: un bulo de Wathsapp pon alerta a todo O Barbanza

Unha información falsa difundida polo servizo de mensaxería e alimentada polas redes sociais indicaba que se detectou un brote de coronavirus durante a celebración dun bautizo nun coñecido restaurante de Boiro.  

Galiciapress contactou coa dirección do local, que desmentiron de forma rotunda estes rumores, que tamén sinalaban que o evento tiña como protagonistas a unha coñecida cantante e actriz galega da TVG.

“É totalmente mentira. Non nos podemos crer todo o que circula polo Whatsapp. Algo así non se podería tapar”. Desta forma tan tallante exprésanse desde a dirección do local afectado, que lamentan que ese bulo que circula por internet desde hai uns días ten exclusivamente a intención “de facer mal e dano”, aínda que non saben precisar se o obxectivo desta información maliciosa é o negocio de restauración ou a presentadora.

Desde o local desmenten que no evento reunísense 150 persoas e que se detectase un brote de coronavirus no local. “Se ocorrese algo así os primeiros en sabelo serían as autoridades sanitarias”, razoan.

NIN 150 AFECTADOS, NIN BROTE…

Nese sentido, e segundo explican para este medio desde a dirección do restaurante, ao evento asistiron ao redor dunha trintena de invitados e, aínda que unha persoa que estivo recentemente en contacto coa actriz si deu positivo nas probas do coronavirus días despois e que se atopa asintomático, en ningún caso trátase dun brote nin se deron novos contagios. “Ningún está libre de non contaxiarse, pero non se deu ningún brote porque algo así se faría público inmediatamente”, sinalan.  

Do mesmo xeito, desde o local afectado por esta información falsa insisten que desde a reapertura do establecemento unha vez terminado o estado de alarma seguíronse de forma estrita todas as recomendacións e restricións sanitarias marcadas pola nova normalidade. “Hoxe tivemos varias comuñóns e a todo o persoal traballando. Non tivemos ningún problema e ninguén estivo en contacto con esa persoa que deu positivo”, recalcan desde o local.

Na dirección do establecemento lamentan as repercusións que este rumor pode ter para un negocio tan maltratado pola crise do coronavirus, xa que a pandemia lastrou economicamente a este sector, que acumula perdas incalculables. “É algo inconcibible todo isto que nos pretenden facer con esta mentira. Os bulos de Whatsapp son perigosos, e especialmente con temas como o COVID-19”, resolven os afectados por este rumor que puxo en alerta a practicamente a toda a comarca do Barbanza.

Captura da mensaxe que está a circular por Whatsapp