O brote de Betanzos repunta os casos na área da Coruña e Vigo tamén crece nunha xornada de alivio en Galicia

Os datos do Servizo Galego de Saúde indican que mentres que a situación parece xa controlada na área de Lugo, a máis afectada nas últimas semanas polo brote da Mariña, o problema agora parece concentrarse na Coruña e Vigo.

Os novos casos que apareceron nas últimas horas nas áreas herculina e olívica provocaron unha escalada nas cifras de dúas zonas que ata o de agora rexistraran un ritmo de descenso moi prometedor. A pesar de todo, hoxe Galicia volve perder casos activos: once menos en 24 horas.

Esta é a terceira xornada seguida na que os datos de Galicia son negativos. Con todo, tamén é a terceira xornada na que Vigo suma novos casos -dous máis- e a segunda na que A Coruña fai o propio -un máis-. O repunte na área herculina podería asociarse facilmente a o brote rexistrado en Betanzos, con nove casos confirmados nas últimas horas. 

Mentres, na área de Vigo os novos positivos poderían estar vinculados co caso que destapou Galiciapress hai uns días, sobre un caso positivo nun voo Madrid-Vigo que provocou o illamento de 12 pasaxeiros. Con todo, aínda é pronto para asegurar que as dúas circunstancias están conectadas. 

ÁREAS EN DESCENSO

Estas son, unha xornada máis, as únicas áreas que sofren repuntes. As mellores cifras chegan hoxe desde a área de Lugo, que xa parece recuperar a normalidade. Hoxe son once os casos que rebaixa a área da cidade amurallada. No últimos tres días perdeu un total de 40 casos activos. Pola súa banda, Santiago de Compostela tamén reduce a súa gráfica, con tres casos menos desde onte.

Ourense, Pontevedra e Ferrol, as tres áreas menos afectadas -entre as tres suman unha ducia de casos- non sofren variacións nesta xornada.

MEDIA MÓBIL

Os once casos menos hoxe en Galicia axudan a manter de forma clara no cambio de tendencia que experimentou Galicia o pasado martes e que previamente sufrira un virage neste sentido. Se o luns referiamos que a escalada de datos, xunto cos outros tres días de repunte que sufriu Galicia a pasada semana por só dúas xornadas en descenso -o sábado a comunidade non perdeu nin sumou casos novos-, supoñían que a media móbil semanal ofrecese porcentaxes positivas, cun crecemento do 0,5%, o martes tórnalas volveron a cambiar e a comunidade a un ritmo de descenso do -0,6%. 

Hoxe, despois de que onte as cifras baixase ata o -0,3%, sitúanse no -1,7%, unha cifra moi boa que indica o ritmo ao que Galicia vai alixeirando as súas cifras de casos activos. Doutra banda, o número de casos activos decrece hoxe en Galicia un 4,6%.

Segundo os datos de as notas de prensa do SERGAS, este xoves 16 de xullo o número de casos activos de coronavirus en Galicia é de 227, dos cales 27 son da área da Coruña, 160 de Lugo, 4 de Ourense, 7 de Pontevedra, 16 da área de Vigo, 12 de Santiago e 1 de Ferrol.