O Obradoiro pasa como un ciclón por Torrelavega e roza o ascenso á ACB (65-95)

O Monbus Obradoiro deu este domingo 3 de maio un golpe case definitivo á tempada. O colectivo da capital galega, arroupado no Vicente Trueba por un gran número de afeccionados, dobregou sen compaixón a un Cantabria moi inferior, que só aguantou tres minutos o ritmo marcado polos composteláns. Co asubío final e un contundente 65-95, a Obra toca de novo a ACB coa palma da man.

Un inicio espellismo e a reacción estelar

O partido arrincou con dúbidas para os galegos tras unha perda de Westermann e o acerto do santiagués Pablo Hernández, que anotou para o Cantabria. Un triplo de Hernández, outro de Powell e unha canastra de Yu acenderon as alarmas cun 12-5 inicial.

Con todo, foi un espellismo. Westermann e Barcello, con senllos mísiles desde a longa distancia, recalcularon a ruta para os de Diego Epifanio, "Epi". Un parcial de 0-11 nos catro minutos finais do primeiro cuarto deu a volta ao luminoso, pasando do 12-5 ao 21-28. Aos cántabros duroulles a gasolina exactamente tres minutos; a partir de aí, a Obra foi dono e señor do duelo.

No segundo período, o Cantabria "borrouse" do encontro. Dous triplos de Barrueta e outro de Brito afastaron a renda até os vinte puntos (29-49). O Obradoiro xogou a pracer, sen trabas e cun baloncesto de elite, alcanzando o descanso cun demoledor 34-53. Os locais só foron capaces de anotar 13 puntos neste parcial ante un Obra que non levantou o pé do acelerador.

Xestión e sentenza tras o descanso

Tras o paso por vestiarios, a diferenza alcanzou unha máxima de +25 (36-61). Aínda que o Obradoiro permitiuse o luxo de xogar a medio gas e relaxar —o que permitiu ao Cantabria gañar o parcial do terceiro cuarto (22-19) e situar a 16 puntos (56-72)—, a vitoria nunca perigou.

No último tramo, o Vicente Trueba rendeuse á evidencia e empezou a escoitar o Miudiño. Un triplo de Barrueta (59-77) e un espectacular mate de Dous Anjos terminaron de afundir a un cadro cántabro que baixou os brazos ante a superioridade física visitante. A distancia chegou a ser de 32 puntos, pechar finalmente no 65-95 definitivo.

Contas para o ascenso: O ceo está cerca

A vitoria deixa ao Obradoiro nunha situación privilexiada para liderar a división e obter a única praza de ascenso directo.  Se o Básquet Coruña perde na súa visita á pista do Fibwi Palma (18:00 horas). Se os herculinos gañan hoxe, a Obra terá que dar o paso definitivo na "caldeira" de Sar fronte ao Gipuzkoa.

O equipo de Epi xa espera noticias desde Mallorca, sabendo que o regreso á máxima categoría é xa só cuestión de tempo.