Pino, acompañada de Arrimadas, insiste en que "falta moi pouquiño para o cambio" e ser "muro de contención do nacionalismo"

A líder da formación laranxa en Galicia, que hoxe estivo acompañada da portavoz nacional Inés Arrimadas, volveu ofrecer o seu apoio a Feijóo e ser o "zume novo" da Xunta,

"O que non quero de ningún xeito é que a clase media volva ser a que pague os pratos rotos", declarou hoxe Pino en Vigo, á vez que fixo un chamamento para non caer nos "delirios nacionalistas" o día 12 de xullo. 

A candidata de Cidadáns á Presidencia da Xunta, Beatriz Pino, asegurou que "falta moi pouquiño para o cambio en Galicia", que pasaría por que a formación laranxa forme parte do goberno galego, e ofreceu a "zume novo" que representa a súa formación política para formar executivo (co PP, algo que non concretou explicitamente).

"Díxenvolo moitas veces estes días pero repítovolo: necesitamos só un pequeno esforzo nesta semana que nos queda para conseguir un gran cambio para Galicia", proclamou nun acto no que estivo arroupada pola presidenta do seu partido, Inés Arrimadas, no que supuxo a súa primeira aparición pública tras dar a luz en maio ao seu fillo.

De feito, Beatriz Pino, que se presenta como a candidata da formación política que "non se conforma", advertiu dos "delirios nacionalistas" en Galicia e as "amizades perigosas" do candidato socialista, Gonzalo Caballero, en referencia ás outras formacións de esquerdas --BNG e Galicia en Común-Anova Mareas-- e ao bipartito da Xunta --previo a 2009-- e avisou do "perigoso" que é linguaxe empregada polos nacionalistas.

Así, asegurou que, como consecuencia do nacionalismo, en Galicia mesmo o actual presidente da Xunta falou de "país" en referencia á Comunidade, unha expresión que lle afeou. "Sabedes o que vos digo? Eu amo á miña terra, Galicia, e ao meu país, España", proclamou a candidata da formación laranxa na que é a súa cidade natal, Vigo, onde mantivo este 'encontro cidadán' no parque de Castrelos nun asollado mediodía de xullo.

Neste sentido, e tras dar as grazas aos numerosos membros da executiva nacional que participaron neste acto, entre eles Edmundo Bal, portavoz no Congreso, e Melisa Álvarez, a portavoz da dirección nacional da formación, que previamente estivera xunto a Pino nun acto en Pontevedra.

"Sabedes o que é nacer como partido político para loitar e ser muro de contención (do nacionalismo)", agradeceu Beatriz Pino dirixíndose a eles, nun acto no que Inés Arrimadas cualificouna de "candidata revelación" no debate televisivo da CRTVG celebrado o pasado luns a sete bandas.

Así, Pino dixo que en Galicia "temos a mesma ameaza" nacionalista, cun PSdeG que "busca cada vez máis esas amizades", censurou Beatriz Pino, quen sostivo que quere "un goberno mellor para Galicia" e cuxa "primeira foto" sexa a de "unha mesa pola reconstrución de Galicia" que lle dea "facilidades" ás familias.

"PRATOS ROTOS"

"O que non quero de ningún xeito é que a clase media volva ser a que pague os pratos rotos", salientou a candidata da formación laranxa, quen lanzou propostas en materia de infraestruturas, como suprimir as peaxes da AP-9, en materia de familia, entre outras.

"Non quero de ningún xeito que, de novo, sexa a clase media a que volva pagar os patos rotos da crise. Xa o fixeron unha vez e non o van a volver facer se este partido está no Goberno da Xunta. E aí imos estar", proclamou.

Beatriz Pino salientou que "temos que conseguir coller ánimo". "Non vou fallar a ningún galego, nin á miña familia nin a Galicia", exclamou nun acto no que saudou ao seu tío, o ciclista Álvaro Pino, para exemplificar que na súa familia coñecen ben o que é "subir" montañas.